Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Omanyamukulo omapulo 10 oo haa pulwa kovanyasha

 EPULO 9

Ondi na mbela okwiitavela mehongo loevolusi?

Ondi na mbela okwiitavela mehongo loevolusi?

OMOLWASHIKE SHA FIMANA OKULIPULA NGAHO?

Ngeenge ehongo loevolusi oli li paushili, onghalamwenyo kai na elalakano lasha. Nongeenge oinima oya shitwa shili, ohatu dulu okumona omanyamukulo taa mbilipaleke komapulo e na sha nonghalamwenyo nosho yo nonakwiiwa.

MBELA OTO KA NINGA PO SHIKE?

Diladila konghalo ei: Alex okwa kala a itavela muKalunga nosho yo meshito. Ndele pomhito imwe okwa li a ngwangwana eshi omuhongi waye wo-Biology a li ta hongo kutya ehongo loevolusi oli li paushili nola kanghamena komaumbangi opaunongononi e shi okulineekelwa. Alex ka li a hala okumonika a fa ehe na eendunge. Okwe ke lipopila ta ti, ‘ngeenge ovanongononi ova yandja oumbangi kutya ehongo loevolusi oli li paushili, olyelye vali ndi na okupula?’

Ngeno oove wa li Alex, mbela ngeno oto ka itavela ashike ehongo loevolusi molwaashi embo lofikola la popya kutya ehongo olo oli li paushili?

KANGHAMA NDELE TO DILADILA!

Ovanhu aveshe ovo hava tomhafana kombinga yoevolusi, ohava popi meendelelo osho va itavela nopehe na okushiiva kutya omolwashike ve shi itavela.

  • Ovanhu vamwe ova itavela ashike kutya oinima oya shitwa molwaashi osho va hongwa komalongelokalunga avo.

  • Vamwe ova itavela mehongo loevolusi molwaashi osho va hongwa keefikola.

 OMAPULO AHAMANO OO U NA OKULIPULA

Ombiibeli otai ti: “Keshe tuu eumbo oli nomutungi walo, ndelenee omutungi waaishe oKalunga.” (Ovaheberi 3:4) Mbela kashi li pandunge okwiitavela ngaho?

Okupopya kutya kaku na Omushiti osha faafana ashike nokutya eumbo eli kali na omutungi

OMUTOTO: Ovanhu ova itavela kutya keshe shimwe meshito osha holoka po ashike kusho vene mepakumo leisho.

1. Olyelye ile oshike sha ningifa oinima i holoke po kuyo vene?

2. Ediladilo lilipi tali ti sha, ole li kutya oinima oya holoka po kuyo vene ile ololo kutya oinima oya etwa po kuumwe?

OMUTOTO: Ovanhu ova itavela kutya otwa dja moinamwenyo.

3. Ngeenge ovanhu ova dja moomunghima, omolwashike pe na eyooloko linene pokati keendunge dovanhu noomunghima?

4. Omolwashike nounima vanini vomeshito ve na omwenyo va kitakana neenghono?

OMUTOTO: Ovanhu ova itavela kutya ehongo loevolusi olo li li apeshe oli li paushili.

5. Mbela omunhu oo a itavela mehongo loevolusi okwa konakona ngoo a mone oumbangi kuye mwene?

6. Ovanhu vangapi va itavela ehongo loevolusi molwaashi ashike va lombwelwa kutya ovanhu aveshe ovanaendunge ove li itavela?

Julia okwa ti: “Ngeno oto ende nee mofuka ove oto mono eumbo liwa, mbela oto ka diladila kutya: ‘Eumbo itali monika tuu nawa eli! Omiti odi na okukala da wila po ashike kudo vene ndele tadi diki po eumbo.’ Oshoshili kutya itashi shiiva, nokashi li pandunge okudiladila ngaho. Ndele omolwashike tu na okwiitavela kutya oinima aishe meshito oye lieta po kuyo vene?”

Gwen okwa ti: “Diladila ngeno omunhu wonhumba te ku lombwele kutya koshinyanyangido shomambo okwa topa ohinga ndele tai lihanene komakuma nomeembuli donhele oyo ndele tai eta po emboitya (dictionary) le lixwa po. Mbela oto ke shi itavela?”

 OMOLWASHIKE WA ITAVELA MUKALUNGA?

Ombiibeli otai ku ladipike u longife ‘eenghono doye dokudiladila.’ (Ovaroma 12:1, NW) Osho osha hala okutya eitavelo loye muKalunga kali na okulikolelela koinima yongaho, ngaashi:

  • OMALIUDO (Ondi wete kutya ope na okukala odjo yeenghono dinene)

  • OMANWEFEMO AVAMWE (Osho sha itavelwa kovanhu momudingonoko wetu)

  • OMAFININIKO (Ovadali vange ova honga nge ndi kale nda itavele muKalunga, haame nda ninga ehoololo)

Mepingafano naasho, ou na okukala u na omatomheno mawa e na sha naasho wa itavela.

Teresa okwa ti: “Ngeenge ndi li motundi handi pwilikine komuhongi wetu ta yelifa nghee omalutu etu haa longo, ihandi kala nda limbililwa kutya Kalunga ke ko. Oshinhimbu keshe sholutu oshi na oshilonga shasho, noutukulwa vanini nokuli, ndele oilonga aishe oyo ngeenge tai longwa ihatu kala tu shi shii. Nopehe na omalimbililo, olutu lomunhu ola kitakana.”

Richard okwa ti: “Ngeenge nda mono etungo la londafana, oshikepa ile otuwa, ohandi lipula kutya, ‘Olyelye a eta po oinima oyo?’ Pashihopaenenwa, otashi pula omunhu omunaendunge opo a nduluke po otuwa molwaashi oi na outukulwa vanini vahapu ovo hava longele kumwe opo i ende. Ndele ngeenge eetuwa oda ndulukwa po komunhu wonhumba, osha yela kutya novanhu ova shitwa.”

Anthony okwa ti: ‘Eshi nda li handi hongwa oihongwa i na sha nounongononi, onda enda handi mono kutya ehongo loevolusi itali dulu okulineekelwa. Otashi pula nge shihapu shi dulife okwiitavela moevolusi ponhele yokukala nda itavela mOmushiti.’

DILADILA KOMBINGA YAASHI

Nonande opa kala tapa ningwa omakonakono omido omilongo, ovanongononi otava twikile okukonga omauyelele e na sha noevolusi opo va fike pexulifodiladilo limwe. Ngeenge omauyelele ovanongononi e na sha nehongo loevolusi itaa tu kumwe, vo ovo ovanawino va pyokoka, mbela osha puka okupula kombinga yalo?