Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Omanyamukulo omapulo 10 oo haa pulwa kovanyasha

 EPULO 4

Ongahelipi handi dulu okuungaunga nomapuko ange?

Ongahelipi handi dulu okuungaunga nomapuko ange?

OMOLWASHIKE SHA FIMANA OKULIPULA NGAHO?

Okudimina omapuko oye ohashi ku kwafele u lihongele ko nou kale omulineekelwa.

MBELA OTO KA NINGA PO SHIKE?

Diladila konghalo ei: Efiku limwe fimbo Timo a li ta dana etanga nookaume kaye, okwa fanga etanga ndele tali ka tatula ekende lotuwa yopoushiinda.

Ngeno okwa li oove Timo, ngeno owa ninga po shike?

KANGHAMA NDELE TO DILADILA!

OU NA OMAHOOLOLO ATATU:

  1. Oto dulu okufaduka po.

  2. Oto dulu okupa umwe ombedi.

  3. Oto dulu okulombwela omushiinda shi na sha naasho sha ningwa po, nokupopya kutya oto ka futa ekende olo.

Oto dulu okuyelekwa u hoolole po Eetepo la-A. Ashike luhapu ohapa kala pe na omatomheno mawa okudimina omapuko oye kutya nee pamwe owa tatula ekende ile oshinima shimwe shi lili.

 KALA HO DIMINE OMAPUKO OYE OMOLWOMATOMHENO ATATU

  1. Okudimina epuko oshi li oshinima sha yuka.

    Ombiibeli oya ti: ‘Otwa hala okweenda nawa moinima aishe.’ — Ovaheberi 13:18.

  2. Luhapu ovanhu ohava dimine po ovo hava dimine omapuko avo.

    Ombiibeli oya ti: ‘Ou ta holeke omatauluko aye, ita ka mona elao. Ndelenee ou te a hepaulula ndee te a efa, ota ka filwa onghenda.’ — Omayeletumbulo 28:13.

  3. Osho sha fimanenena, okudimina omapuko ohashi hafifa Kalunga.

    Ombiibeli oya ti: ‘Osheshi omupukifi oye oixuna kOmwene, ndelenee Ye omushiivikile wovayuki.’ — Omayeletumbulo 3:32.

Karina womido 20 okwa li ta kendabala okuholeka xe okatekete oko a shangwa eshi a li ta shingilile. Molwaashi omunhu ito dulu okuholeka enyono ndele tali kala inali monika, Karina ina dula okuholeka okatekete kaye fiyo alushe. Okwa ti: “Konima yomudo lwaapo, tate okwa li e litwa okatekete ke na edina lange, ndele handi i nee moupyakadi.”

Oshike e lihonga mo? Karina okwa ti: “Okuholeka omapuko ohashi naipike ashike oinima. Natango oidjemo yomapuko oye oove ngoo i na oku ka landula.”

NGHEE TO DULU OKULIHONGA KOMAPUKO OYE

Ombiibeli oya ti: “Atushe ohatu puka luhapu.” (Jakob 3:2) Ngaashi twe shi mona, opo omunhu a dimine omapuko aye, oku na okukala omulininipiki, ha diladila pandunge noku na okudimina pefimbo opo.

Onghatu ya landula ko okulihonga sha komapuko oye. Okakadona kedina Vera oka ti: “Ohandi kendabala okutala ko epuko lange keshe la fa oshilihongomwa omo handi lihongo mo sha. Osho ohashi kwafele nge ndi kale omunhu e li xwepo nokuungaunga nonghalo oyo monghedi imwe i lili moshikando tashi landula.” Natu ka tale nghee to dulu okuninga ngaho.

Natu tye nee ngeno owa indila tate woye ombasikela, ove oto i teya. Oto ka ninga po shike?

  • Oto ka kala ashike wa mwena to diladila kutya tate woye ita mono po sha?

  • Oto ka lombwela tate woye osho sha ningwa po filufilu?

  • Oto ka lombwela tate woye osho sha ningwa po, ndele to pe umwe ombedi?

Natu tye nee owa dopa okakonakono molwaashi ino lesha. Oto ka ninga po shike?

  • Oto ka pa ombedi okakonakono oko?

  • Oto ka dimina kutya oove wa etifa edopo la tya ngaho?

  • Oto ka popya kutya omuhongi ke ku hole ile oku ku nine?

Ngaashi ashike omushingi ha shingi ta tale meshipili lokonima, naave ou na okukala ho tale komapuko oye omonakudiwa opo u lihongele ko

 Paife tala vali keenghalo da tetekela, ndele to kendabala okufaneka momadiladilo oye, ngeno oove nee (1) tate woye nosho yo (2) omuhongi woye. Mbela tate woye nosho yo omuhongi woye otava ka diladila shike kombinga yoye ngeenge owa dimine omapuko oye? Mbela otave ke ku tala ko ngahelipi ngeenge owa holeke omapuko oye?

Paife diladila kombinga yepuko limwe olo wa ninga omudo wa dja ko, ndele to nyamukula omapulo taa landula.

Epuko olo ola li lashike? Ongahelipi wa li wa ungaunga nalo?

  • Onda li nde li holeka.

  • Onda li nda pa umwe ombedi.

  • Onda li nde li dimina.

Ngeenge kwa li wa dimina epuko loye, owa li u udite ngahelipi konima yaasho?

  • Onda li ndi udite nawa molwaashi onda ungaunga nawa nalo.

  • Onda li ndi udite ondjo handi lipula kutya ngeno onda popile oshili.

Ongahelipi kwa li to dulu okuungaunga noupu nonghalo oyo?

Oshike we lihonga mepuko loye?

OTO DILADILA NGAHELIPI?

Omolwashike ovanhu vamwe ihava dimine omapuko avo?

Ovanhu otave ke ku tala ko ngahelipi ngeenge oho kendabala alushe okuholeka omapuko oye, notave ke ku tala ko ngahelipi ngeenge oho a dimine? — Lukas 16:10.