Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Omanyamukulo omapulo 10 oo haa pulwa kovanyasha

 EPULO 1

Ame omunhu naanaa a tya ngahelipi?

Ame omunhu naanaa a tya ngahelipi?

OMOLWASHIKE SHA FIMANA OKULIPULA NGAHO?

Okukala u shii kutya ove omunhu a tya ngahelipi nowa fikama peni, otashi ke ku kwafela u ninge omatokolo e li pandunge ngeenge u li momafininiko.

MBELA OTO KA NINGA PO SHIKE?

Diladila konghalo ei: Efiku limwe omanga Karen e li pokavilo, ina ninga po nominute omulongo, okwa uda ondaka tai ingida konima yaye tai ti:

“Naave hamba opo u li apa?”

Eshi Karen a keuka, okwa mona kahewa kaye Jessica a humbata oukende vavali va tuuka. Karen okwa mona kutya oukende ovo ove na oalkoholi. Jessica okwa yelula okakende kamwe komesho yaKaren, ndele ta ti: “Tambula, ove ku fi vali okaana, owa kula nowa pumbwa okulihafifa, ile hasho?”

Karen okwa li a hala okwaanya, ashike ka li a hala okuudifa nai kahewa kaye Jessica. Karen ka li yo a hala Jessica a diladile kutya oku li konima yefiya. Shimwe vali, Jessica okahewa kaye kopofingo, nongeenge okwa nu, kape na oupyakadi. Karen okwe lipopila ta ti: ‘Ohandi nu ashike omalodu, inashi fa ngeno handi longifa oingangamifi.’

Ngeno oove wa li monghalo ya fa yaKaren, ngeno oto ka ninga po shike?

KANGHAMA NDELE TO DILADILA!

Opo u ninge omatokolo e li pandunge meenghalo odo, owa pumbwa okushiiva kutya ove omunhu a tya naanaa ngahelipi. Osho osha hala kutya, ou na okukala u shii elihumbato loye lopaenghedi naasho wa itavela. Okukala u na eshiivo la tya ngaho, otashi ke ku kwafela u pangele onghalamwenyo yoye ponhele yokweefa i wilikwe kuvamwe. — 1 Ovakorinto 9:26, 27.

Ongahelipi to dulu okushiiva kutya ove omunhu a tya naanaa ngahelipi nowa fikama peni? Ngeenge owa nyamukula omapulo oo eli pepandja 4 neti-5, otae ke ku kwafela u pondole.

 1 OMOINIMA ILIPI HANDI SHI ENDIFA NAWA?

Okukala u shii okudula nokuhadula kwoye nosho yo omaukwatya mawa oye, otashi ke ku kwafela u kale we lineekela mwoove mwene.

OSHIHOPAENENWA SHOPAMBIIBELI: Omuyapostoli Paulus okwa ti: “Ngenge aame omushima mokupopya, kandi fi omushima mokushiiva.” (2 Ovakorinto 11:6) Molwaashi Paulus okwa li e udite ko nawa Omishangwa, osha li she mu kwafela a kale omudiinini ngeenge a li ta yelekwa. Ka li ha efa okupopilwa mowii kuvamwe ku nghundipaleke eitavelo laye. — 2 Ovakorinto 10:10; 11:5.

LIKONAKONA: Shanga pomufinda ou owino oo u na.

Shanga yo omaukwatya mawa oo u na. (Pashihopaenenwa, mbela ou na olukeno, oho yandje, ou mu lineekelwa noho fiki ngoo pefimbo?)

2 OMOINIMA ILIPI IHANDI SHI ENDIFA NAWA?

Ngaashi ashike elyenge hali kala la kola ile lihe na eenghono she likolelela kunghee la kwatafana pomatwikililo alo, ounhu woye womeni otau dulu okulunduluka noupu ngeenge owa efa ounghundi woye u pangele onghalamwenyo yoye.

OSHIHOPAENENWA SHOPAMBIIBELI: Paulus okwa li e shii nawa omaunghundi aye. Okwa ti: “Kombinga yomunhu ou womeni onda dimina nehafo omhango yaKalunga, ndele moinhimbu yange ondi wete omhango ikwao tai kondjifa omhango yomadiladilo ange, ndele otai pikile nge momhango youlunde.” — Ovaroma 7:22, 23.

LIKONAKONA: Mbela owa pumbwa okulihonga okuungaunga nounghundi ulipi?

 3 OMALALAKANO ELIPI NDE LITULILA PO?

Natu tye nee ngeno owa londa motekisa, ndele to lombwele omushingi a dingilile oluumbo lonhumba lwoikando fiyo otuwa yaye ya pwa omahooli. Mbela otashi ka kala ngoo shi li pandunge okuninga ngaho? Hasho nandenande, osho otashi ka hepeka omahooli.

Sha faafana, ngeenge ino litulila po omalalakano, ito ka ninga exumokomesho monghalamwenyo yoye. Noito ka mona kutya omalalakano elipi wa hala okuhanga, nonghee to ke shi enda opo u a hange.

OSHIHOPAENENWA SHOPAMBIIBELI: Omuyapostoli Paulus okwa ti: “Ame inandi hala ndi tondoke inandi shiiva efikilo.” (1 Ovakorinto 9:26) Paulus okwa li e litulila po omalalakano nokukala metwokumwe nao, ponhele yokweefa ashike oinima i ningwe monghalamwenyo yaye nopehe na elalakano lasha. — Ovafilippi 3:12-14.

LIKONAKONA: Shanga omalalakano atatu oo wa hala okuhanga momudo tau uya.

4 OSHIKE NDA ITAVELA MUSHO?

Ngeenge owa diinina elihumbato loye lopaenghedi naasho wa itavela, oto ka kala ngaashi omuti oo u na omidi da ya moule odo tadi dulu oku u amena uha we po koshikungulu

Oto ka kala to ongaonga okuninga omatokolo ngeenge ku na osho wa itavela musho. Ngaashi fimbi ha lundulula omaluvala aye, naave oto ka lundulula omalalakano oye opo u wapalele oomakula voye, notashi ka ulika kutya ounhu woye womeni inau likolelela kusha.

Mepingafano naasho, ngeenge eenghatu doye oda kanghamena kwaasho wa itavela, oto ka kaleka po ounhu woye womeni.

OSHIHOPAENENWA SHOPAMBIIBELI: Omuprofeti Daniel eshi a li omunyasha okwa li a “tokola momutima waye” a dulike komhango yaKalunga nonande okwa li kokule noukwaneumbo wavo. (Daniel 1:8) Osho osha li she mu kwafela a kale metwokumwe nomalalakano aye naasho a itavela.

LIKONAKONA: Oshike wa itavela musho? Pashihopaenenwa: Owa itavela mbela muKalunga? Ngeenge osho, omolwashike? Oshike she ku tomha u itavele kutya Kalunga oko e li?

Mbela owa itavela ngoo kutya omifikamhango daKalunga dopaenghedi odi lile po ouwa woye? Ngeenge osho, omolwashike?

Mbela owa hala okukala ngaashi efo la wa komuti olo tali telaanifwa keemhepo adishe ile owa hala okukala ngaashi omuti oo u li ofika wa pama nonande oku dje oikungulu inene? Onghee hano, pameka ounhu woye womeni opo u kale ngaashi omuti oo. Naasho otashi ke ku kwafela u nyamukule epulo olo kutya, ame omunhu naanaa a tya ngahelipi?