Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 114

Oukolokoshi aushe otau ka xulifwa po

Oukolokoshi aushe otau ka xulifwa po

OSHIKE u wete mefano olo? Heeno, etangakwaita la londa keenghambe ditoka. Ndele tala kutya otali di peni. Eenghambe davo otadi tondoka koilemo tadi di meulu. Mbela meulu omu na ngoo eenghambe do venevene?

Ahowe, kamu na eenghambe do venevene. Osho otu shi shii molwaashi eenghambe itadi dulu okutondoka kombada yoilemo, hasho mbela? Ndele Ombibeli otai popi shi na sha neenghambe di li meulu. Mbela ou shi shii kutya omolwashike ya popya ngaho?

Omolwaashi eenghambe oda li hadi longifwa unene moita. Onghee hano, Ombibeli oya xunganeka shi na sha novanhu va londa keenghambe tadi di meulu, osho tashi ulike kutya Kalunga ota ka lwifa ovanhu vokombada yedu. Mbela ou shi shii kutya onhele opo ta pa ka lwilwa oita oyo ohai ifanwa shike? Ohai ifanwa Harmagedon. Oita oyo otai ka xulifa po oukolokoshi aushe kombada yedu.

Jesus oye ta ka kala omukulunhu woita oyo tai ka luwa puHarmagedon. Dimbuluka kutya Jehova okwa hoolola nale Jesus a ninge ohamba yOuhamba waYe. Nomolwaasho a djala oshishani shohamba komutwe. Eongamukonda olo e kwete otali ulike kutya ota ka dipaa ovatondi vaKalunga aveshe. Mbela oshi na oku tu kumwifa eshi Kalunga ta ka hanauna po ovakolokoshi aveshe?

Shuna kEhokololo 10. Oshike u wete mefano olo? Eyelu linene olo la li la hanauna po ovakolokoshi vopefimbo laNoa. Olyelye a li a etifa Eyelu olo? Jehova Kalunga oye a li a etifa Eyelu olo. Paife tala kEhokololo 15. Oshike osho tashi ningwa po mefano olo? Jehova oye a li a hanauna po Sodom naGomorra nomundilo wa dja meulu.

Paife penuna pEhokololo 33. Tala osho sha li sha ningilwa eenghambe nosho yo omatemba oita aEgipti mefano omo! Olyelye a li a ningifa omeva a pwipwikilile po Ovaegipti? Jehova oye a li e shi ninga opo a amene oshiwana shaye. Tala vali kEhokololo 76. Oto ka mona kutya Jehova okwa li nokuli a efa oshiwana shaye shOvaisrael, shi hanaunwe po omolwoilonga yasho youkolokoshi.

Onghee hano, itashi tu kumwifa eshi Jehova ta ka tuma omatanga aye ovakwaita omeulu a xulife po oukolokoshi aushe kombada yedu. Ndele diladila kutya osho otashi ka tya shike! Penuna epandja la landula ko u tale.

Ehololo 16:16; 19:11-16.