Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 110

Timoteus ta ningi omulongi pamwe naPaulus

Timoteus ta ningi omulongi pamwe naPaulus

OMULUMENHU omunyasha oo u wete mefano omo e li nomuyapostoli Paulus oTimoteus. Timoteus okwa kala pamwe noukwaneumbo wavo muListra. Ina oEunike nainakulu oLoide.

Osho osha li oshikando oshititatu Paulus ta talele po muListra. Opa li pa pita hanga oule wodula imwe okudja eshi Paulus naBarnabas va li ve uya okuudifa muListra oshikando shotete. Paulus okwa li a alukila ko vali nakaume kaye Silas.

Mbela ou shi shii kutya Paulus ota lombwele Timoteus shike mefano omo? Ote mu pula ta ti: ‘Ino hala okuninga omulongi pamwe nafye? Oto ka kala to tu kwafele eshi hatu ka udifila ovanhu koitukulwa yokokule.’

Timoteus okwa nyamukula a ti: ‘Heeno, onda hala okuya pamwe nanye!’ Diva, Timoteus okwa fiya po oukwaneumbo wavo nokwa ya pamwe naPaulus naSilas. Ndele fimbo inatu ka uda shi na sha nolweendo lavo, natu ka taleni tete kutya oshike sha li sha ningilwa Paulus. Opa li pa pita omido 17 okudja eshi Jesus a li e lihololela Paulus mondjila yokuya kuDamaskus.

Dimbuluka kutya Paulus okwa li ta i kuDamaskus opo a ka hepeke ovahongwa vaJesus, ndele paife okwa ninga omuhongwa waJesus. Lwanima, ovatondi vaPaulus vamwe ova li va pangela omhangela yoku mu dipaa, molwaashi kava li va panda eshi a li ta hongo ovanhu kombinga yaJesus. Ashike ovahongwa vamwe ova li va kwafela Paulus a ye onhapo. Ova li ve mu tula moshimbaba, ndele tave mu kulukifile nongodi kondje yekuma loshilando.

Okudja opo, Paulus okwa li a ya kuAntiokia a ka udifile oko. Ovashikuli vaJesus ova li va ifanwa oshikando shotete Ovakriste moshilando osho. Ndele Paulus naBarnabas ova li va tumwa okudja muAntiokia va ye molweendo va ka udifile koilongo yokokule. Ova li va talela po yo Listra, moshilando omo mwa li hamu di Timoteus.

Konima yomudo umwe lwaapo, Paulus okwa li natango a ka talela po muListra fimbo a li molweendo laye olutivali loutumwa. Mbela ou shi shii kutya Timoteus, Paulus naSilas ova li va ya peni nopeni eshi va dja muListra? Natu taleni mokaalita eenhele dimwe oko va li va enda.

Tete, ova li va ya koshilando osho sha li popepi Ikonio, opo nee ova ya koshilando shedina Antiokia. Okudja opo, ova li va ya kuTroas nolwanima ova li va ya kuFilippi, kuTessalonika nosho yo kuBerea. Mbela ou wete mo Atena mokaalita omo? Paulus okwa li yo a udifila mo moshilando osho. Okudja opo, ova ka kala tava udifa oule womudo umwe netata muKorinto. Xuuninwa, ova ka kala oule wokafimbo muEfeso. Opo nee, ova ka shuna nowato kuKesarea nova li va ya fiyo okuAntiokia oko Paulus kwa li ha di.

Timoteus okwa li a enda eekilometa omafele nomafele ta kwafele Paulus mokuudifa “onghundana iwa” nokutota po omaongalo opaKriste mahapu. Ngeenge wa kulu, mbela oto ka kala ngoo omupiya waKalunga omudiinini ngaashi Timoteus?

Oilonga 9:19-30; 11:19-26; etukulwa eti-13 fiyo eti-17; neti–18:1-22.

Lihonga shihapu

Timoteus okwa li a hala okukwafela ovanhu

Ongahelipi to dulu okukala nonghalamwenyo ihafifa ngaashi Timoteus?