Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 106

Ovayapostoli tava mangululwa modolongo

Ovayapostoli tava mangululwa modolongo

TALA omweengeli mefano olo oo e kwete omuvelo wodolongo wa yeuluka! Ovalumenhu ovo ta mangulula modolongo ovayapostoli vaJesus. Natu ka taleni kutya oshike sha li she va tulifa modolongo.

Konima yokafimbo kaxupi okudja eshi ovahongwa vaJesus va li va tililwa omhepo iyapuki, Petrus naJohannes ova li va ya kotembeli muJerusalem efimbo lomutenya. Eshi ve uya popepi nomuvelo wotembeli, ova li va hanga po omulumenhu wonhumba oo a kala oshingudu okukalamwenyo kwaye akushe. Ovanhu ova li have mu humbata keshe efiku noku mu tula poshivelo shotembeli opo a ehele ovanhu oimaliwa ovo tava i motembeli. Onghee hano, eshi a mona Petrus naJohannes, okwa li e va ehela ve mu pe sha. Mbela ovayapostoli ovo ova li va ninga po shike?

Ova li va kanghama, ndele tava tale komulumenhu oo a li a mona oixuna. Petrus okwa tya kuye: ‘Nghi na oimaliwa, ndele ohandi ku pe eshi ndi kwete. Fikama u ende medina laJesus!’ Opo nee, Petrus okwe mu kwata keke lokolulyo nomulumenhu okwa fikama po diva, ndele ta hovele okweenda. Eshi ovanhu va mona oshikumwifilonga osho, ova li va kumwa nai nova li va hafa neenghono.

Petrus okwa lombwela ovanhu ovo a ti: ‘Oshikumwifilonga osho otwe shi longa keenghono daKalunga ou a nyumuna Jesus koufi.’ Ndele fimbo Petrus naJohannes tava popi, ovawiliki vonhumba vomalongelokalunga ove uya puvo. Ovawiliki ovo ova li va handuka, molwaashi Petrus naJohannes ova li tava lombwele ovanhu kutya Jesus okwa nyumunwa koufi. Onghee hano, ova kwata po Petrus naJohannes nove va idilila modolongo.

Mefiku la landula ko, ovawiliki vomalongelokalunga ova li ve na oshoongalele shinene. Opo nee, ova li va etifa Petrus naJohannes nomulumenhu oo a velulwa kuPetrus naJohannes moshoongalele osho. Ovawiliki vomalongelokalunga ovo ova li ve va pula tava ti: ‘Oshikumwifilonga osho mwa longa omwe shi longa keenghono dalyelye?’

Petrus okwe va lombwela kutya oshikumwifilonga osho ova li ve shi longa keenghono daKalunga oo a nyumuna Jesus koufi. Ovapristeri ovo kava li tava dulu okuninga po sha vali, molwaashi kava li tava dulu okupatana kutya oshikumwifilonga inashi ningwa shili. Onghee hano, ova li va londwela ovayapostoli vaha popye sha vali shi na sha naJesus nove va efa vaye.

Ndele ovayapostoli ova li va twikila okuudifa shi na sha naJesus nova kala tava velula ovanaudu. Eenghundana di na sha noikumwifilonga oyo oda li da tandavela. Onghee hano, ovanhu vahapu vomoilando oyo ya li popepi naJerusalem navo ova li va eta ovanaudu vavo opo va velulwe kovayapostoli. Osho osha li sha handukifa ovawiliki vomalongelokalunga, nomolwaasho ova li va kwata po ovayapostoli, ndele tave va tula modolongo. Ashike ovayapostoli modolongo inava kala mo efimbo lile.

Omweengeli umwe waKalunga okwa li e uya oufiku, ndele ta yeulula omuvelo wodolongo ngaashi tu shi wete mefano omo. Omweengeli okwa li a lombwela ovayapostoli a ti: ‘Indeni kotembeli, mu ka kale tamu udifile ovanhu.’ Ongula yefiku la landula, ovawiliki vomalongelokalunga ova li va tuma ovalumenhu kodolongo va ka tale ko ovayapostoli, ndelenee inave va hanga ko. Lwanima, ovalumenhu ovo ova ka hanga ovayapostoli tava hongo ovanhu motembeli nova li va kwata po ovayapostoli, ndele tave va twala komhangu yopombada yOvajuda.

Ovawiliki vomalongelokalunga ovo ova li va lombwela ovayapostoli tava ti: ‘Otwe mu shilika muha honge vali ovanhu shi na sha naJesus, ndele taleni, Jerusalem ashishe omwe shi yadifa nehongo leni.’ Ovayapostoli ova nyamukula tava ti: ‘Fye otu na okudulika kuKalunga ponhele yokudulika kovanhu.’ Onghee hano, ova li va twikila okuudifa ‘onghundana iwa.’ Ovayapostoli ovo inave tu tulila po tuu oshihopaenenwa shiwa!

Oilonga etukulwa eti-3 fiyo eti-5.