Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 104

Jesus ta shuna meulu

Jesus ta shuna meulu

JESUS okwa kala te lihololele ovashikuli vaye lwoikando ihapu. Oshikando shimwe okwa li e lihololela ovahongwa ve li 500 lwaapo. Mbela ou shi shii kutya Jesus okwa li e va lombwela shike? Okwa li e va lombwela kombinga youhamba waKalunga. Jehova okwa li a tuma Jesus kombada yedu opo e uye a honge ovanhu shi na sha nOuhamba. Jesus okwa li ta wanifa po oshilonga osho nokuli nokonima eshi a nyumuka koufi.

Mbela oto dimbuluka kutya Ouhamba waKalunga oshike? Heeno, Ouhamba waKalunga oo epangelo lomeulu lolelalela. Jehova okwa hoolola Jesus a ninge ohamba yao. Ngaashi twe lihonga nale, Jesus okwa li a ulika fimbo a li kombada yedu kutya ota ka kala ohamba ikumwifi, molwaashi okwa li ha kutifa ovafindjala, ha velula ovanaudu nokwa li nokuli ha nyumuna ovafi.

Eshi Jesus ta ka pangela e li ohamba meulu oule womido eyovi, mbela onghalo kombada yedu otai ka kala ya tya ngahelipi? Pefimbo opo, edu alishe otali ka ninga oparadisa. Itaku ka kala vali oita ile ekaulonyanga ile omikifi nokuli nefyo itali ka kala ko vali. Osho otu na oushili washo, molwaashi Kalunga okwa li a shita edu li ninge oparadisa opo ovanhu va dule okukala ko tava hafele onghalamwenyo. Nomolwaasho, pehovelo Kalunga okwa li a twika oshikunino muEden. Onghee hano, Jesus ota ka shilipaleka kutya elalakano laKalunga olo lopehovelo ola wanifwa.

Efimbo ola ka fika opo Jesus a shune meulu. Ndele fimbo ina shuna, okwa kala te lihololele ovahongwa vaye oule womafiku 40. Onghee hano, ovahongwa vaye ova li ve na oushili kutya Jesus okwa nyumuka koufi. Ndele fimbo Jesus ina londa keulu, okwa li a lombwela ovahongwa vaye a ti: ‘Kaleni muJerusalem, fiyo mwa tililwa omhepo iyapuki.’ Omhepo iyapuki oyo eenghono daKalunga tadi longo. Otai dulu okufaafanifwa nomhepo oyo hai pepe, ndelenee yo ohai kwafele ovashikuli vaJesus va wanife po ehalo laKalunga. Hauxuuninwa, Jesus okwa li a lombwela ovashikuli vaye a ti: ‘Omu na okuudifa kombinga yange fiyo okominghulo dedu.’

Ndele eshi a mana okupopya eendjovo odo, opa li pa ningwa oshinima shikumwifi neenghono. Jesus okwa li a hovela okuyeluka po ta shuna meulu ngaashi tu shi wete mefano omo. Okwa ka uvikwa koshilemo novahongwa kava li tava dulu oku mu mona vali. Okudja opo, Jesus okwa ya meulu nokwa twikila okuwilika ovashikuli vaye vokombada yedu okudja meulu.

1 Ovakorinto 15:3-8; Ehololo 21:3, 4; Oilonga 1:1-11.