Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 84

Omweengeli te lihololele Maria

Omweengeli te lihololele Maria

OMUKAINHU oo u wete mefano olo ta monika nawa Omuisrael. Edina laye oMaria. Maria okwa li ha kala moshilando hashi ifanwa Nasaret. Kalunga okwa li e shi shii kutya Maria okwa li e na omaukwatya mawa neenghono, nomolwaasho okwa li a tuma omweengeli waye Gabriel a ka popye naMaria. Mbela ou shi shii kutya Gabriel okwa li a tumwa a ka lombwele Maria shike? Natu ke shi taleni.

Eshi Gabriel e uya kuMaria, okwe mu popifa a ti: ‘Kundwa, oove omunangekwa noupuna. Jehova oku li pamwe naave.’ Maria okwa li a kwatwa koumbada, molwaashi ka li a shakeneka nande onale omunhu oo noka li e udite kutya okwa hala okutya shike. Ndele pefimbo opo tuu opo, Gabriel okwa lombwela Maria aha kale a tila.

Omweengeli Gabriel okwa ti: ‘Maria, ino tila. Jehova okwe ku hokwa neenghono, nomolwaasho ote ke ku ningila ouwa. Oto ka ninga oufimba, ndele to dala okaana. Ou na oku ka luka Jesus.’

Gabriel okwa twikila okuyelifila Maria ta ti: ‘Okaana oko otaka ka ninga omunenenhu, notaka ka ifanwa Omona waKalunga Omukombadambada. Jehova ote ke mu ninga ohamba ngaashi David. Ashike Jesus ota ka kala ohamba fiyo alushe, nouhamba waye kau na efiku nau ka xule po.’

Maria okwa pula omweengeli ta ti: ‘Eshi ame inandi hombolwa natango noinandi kala pamwe nomulumenhu nale, ohandi ka dula ngahelipi okudala okaana?’

Gabriel okwe mu nyamukula a ti: ‘Eenghono daKalunga otadi ke uya kombada yoye. Nomolwaasho, okaana otaka ka ifanwa Omona waKalunga.’ Gabriel okwa twikila ko a ti: ‘Dimbulukwa omupambele woye Elisabet. Ovanhu ova li tava ti kutya ita ka dala okaana, molwaashi okwa kulupa nokumona ounona. Ndele mafiku naye ota ka dala okaana okamati. Onghee hano, kala wa shilipalekwa kutya Kalunga iha nyengwa kusha.’

Opo nee Maria okwa ti: ‘Aame omupiya waJehova okakadona! Ashishe nashi wanifilwe nge ngaashi wa popya.’ Okudja opo, omweengeli okwa dja po puye.

Maria okwa endelela divadiva a ka talele po Elisabet. Ndele eshi ngoo Elisabet a uda ondaka yaMaria, okahanana kaElisabet oko ka li natango medimo oka hovela okunuka kehafo. Elisabet okwa li a yadifwa nomhepo iyapuki nokwa lombwela Maria ta ti: ‘Oove omunangekwa noupuna mokati kovakainhu vakweni.’ Maria ova kala naElisabet oule weemwedi nhatu, nolwanima okwa ka shuna keumbo lavo kuNasaret.

Maria okwa li okakadona ka kongwa komulumenhu wedina Josef. Ndele eshi va fika okuhombola, Josef ka li vali a hala okuhombola eshi a mona kutya mboli Maria omufimba. Ndele omweengeli waKalunga okwa lombwela Josef a ti: ‘Ino tila okuhombola Maria a ninge omukulukadi woye, molwaashi okaana aka ta ka dala okwe ka pewa kuKalunga.’ Okudja opo, Maria naJosef ova hombola nova kala va teelela Jesus a dalwe.

Lukas 1:26-56; Mateus 1:18-25.

Lihonga shihapu

Maria—“Tala, aame omupiya wOmwene”

Onghedi omo Maria e linyenga ketumwalaka lomweengeli oya li ya holola shike kombinga yeitavelo laye? Okwa li vali a ulika omaukwatya amwe a fimana elipi?