Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 89

Jesus ta taataa ovashingifi motembeli

Jesus ta taataa ovashingifi motembeli

JESUS ota monika lela a handuka mefano olo, hasho mbela? Mbela ou shi shii kutya omolwashike a handuka ngaho? Okwa li a handuka, molwaashi ovalumenhu ovo u wete mefano ve li motembeli yaKalunga ova li ovanalwisho voimaliwa. Otava kendabala okulikola oimaliwa ihapu movanhu ovo have uya kotembeli okulongela Kalunga.

Mbela ou wete mo eengobe deenyasha needi neenghuti mefano olo? Oinamwenyo aishe oyo otai landifwa kovalumenhu ovo have uya okulandifila motembeli. Mbela ou shi shii kutya omolwashike? Ohave uya okulandifila motembeli, molwaashi Ovaisrael ova li pumbwa okuningila Kalunga omaxwikiloyambo oimuna noudila.

Omhango yaKalunga oya li tai pula kutya ngeenge Omuisrael okwa ningi epuko lonhumba, oku na okuyambela Kalunga eyambo. Kakele kaasho, opa li yo natango eemhito dimwe opo Ovaisrael va li hava yambele Kalunga omayambo. Ndele mbela openi Ovaisrael va li tava dulu okuhanga oinamwenyo opo va yambele Kalunga omayambo?

Ovaisrael vamwe ova li ve na eengobe davo vene noudila. Onghee hano, ova li tava dulu okuyamba po imwe yomoinamwenyo yavo. Ndele Ovaisrael vamwe ova li va hepa, kava li ve na oimuna ile oudila. Vamwe ova li hava di kokule naJerusalem, nomolwaasho kava li tava dulu okushinga oimuna okudja kokule ve uye nayo kotembeli. Onghee hano, ovanhu ova li have uya okulanda oimuna ile oudila potembeli opo va dule okuyambela Kalunga omayambo. Ndele ovalumenhu ovo va li hava shingifile motembeli ova li hava nyokoma vakwao, tava pula oimaliwa ihapu neenghono. Shikwao vali, kava li ve na okukala tava landifile oinamwenyo yavo motembeli yaKalunga.

Osho osho sha li sha handukifa Jesus. Onghee hano, okwa li a undwila poshi oitaafula yovalumenhu ovo noimaliwa yavo oya li ya halakana pedu. Natango, Jesus okwa li a ninga ongola ndele ta te mo nayo oinamwenyo aishe motembeli, nokwa li a lombwela ovalandifi veenghuti a ti: ‘Kufei mo oinima ei! Ongulu yaTate inamu i ninga onhele yokulikolela oimaliwa.’

Ovahongwa vaJesus vamwe ova li ve uya pamwe naye kotembeli muJerusalem. Ova li va kumwa eshi va mona Jesus ta ningi ngaho. Ndele osho oshe va dimbulukifa omushangwa umwe mOmbibeli oo tau popi kombinga yOmona waKalunga, tau ti: ‘Ohole yaye yokuhola ongulu yaKalunga otai ka kala ya xwama muye ngaashi omundilo.’

Jesus okwa li a longa oikumwifilonga ihapu pefimbo olo a li e uya koshivilo shOpaasa muJerusalem. Konima yefimbo, Jesus okwa dja mo muJudea ndele ta shuna kuGalilea. Ndele manga ina fika muGalilea, okwa li a tavakana moshitukulwa shaSamaria. Natu ka taleni kutya oshike sha li sha ningwa po fimbo a li ta tavakana moshitukulwa osho.

Johannes 2:13-25; 4:3, 4.