Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 94

Jesus okwa li e hole ounona vanini

Jesus okwa li e hole ounona vanini

TALA kuJesus mefano olo eshi a papatela okamati oko kanini! Ou shi liwetele kutya Jesus oku na ko nasha shili nounona. Ovalumenhu ovo ve li puye tave mu tale ovayapostoli vaye. Mbela Jesus ote va lombwele shike? Natu ka taleni kutya ote va lombwele shike.

Pefimbo opo, Jesus novayapostoli vaye opo ashike va di molweendo lile. Fimbo va li mondjila, opa li pa tukuluka eemhata mokati kovayapostoli vaye. Onghee hano, eshi va mana olweendo lavo, Jesus okwe va pula a ti: ‘Omwa li tamu tu eemhata kombinga yashike mondjila?’ Paulelalela, Jesus okwa li e shii kutya ova li tava tu eemhata kombinga yashike. Ndele okwe va pula ashike epulo olo opo a tale ngeenge otave mu lombwele.

Ovayapostoli inava nyamukula epulo olo, molwaashi ova li tava tu eemhata kutya olyelye munene mokati kavo. Ovayapostoli vamwe ova li va hala okukala va fimana ve dule vakwao. Ongahelipi Jesus a li e va kwafela va mone kutya osha puka okukala ve litala ko va fimana ve dule vakwao?

Jesus okwa li a ifana okamati kanini, ndele te ka kaleke ofika mokati kavo. Opo nee, okwa lombwela ovahongwa vaye a ti: ‘Oshili ohandi mu lombwele, ngeenge itamu lundulula oikala yeni ndele tamu kala ngaashi ounona vanini, itamu ka ya mo mouhamba waKalunga. Ou e li ngaashi okaana aka, oye ta ka ninga munene mouhamba waKalunga.’ Mbela ou shi shii kutya omolwashike Jesus a popya eendjovo odo?

Omolwaashi ounona vanini ihave lipula shi na sha nokukala ve dule vakwao ile va fimana ve dule vakwao. Onghee hano, ovayapostoli ova li ve na okulihonga okukala ve lininipika ngaashi ounona, ndele haku kala tava tu eemhata shi na sha naau munene ile a fimana mokati kavo.

Jesus okwa li yo a ulika peemhito dimwe kutya oku na ko nasha nounona vanini. Eemwedi dinini konima yaasho, ovanhu vamwe ova li va eta ounona vavo kuJesus. Ndele ovayapostoli ova li tava kendabala oku va kelela ko. Jesus okwa li a lombwela ovayapostoli vaye a ti: ‘Efeni ounona ve uye kuame, inamu va kelela ko, osheshi ouhamba waKalunga owaava ve li ngaashi ounona.’ Okudja opo, Jesus okwa papatela ounona momaoko aye nokwe va nangeka noupuna. Mbela kashi hafifa okushiiva kutya Jesus oku hole ounona vanini?

Mateus 18:1-4; 19:13-15; Markus 9:33-37; 10:13-16.