Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 91

Jesus ta udifile ovanhu komhunda

Jesus ta udifile ovanhu komhunda

TALA kuJesus oo e li omutumba mefano olo, ta hongo eemhunga dovanhu adishe odo komhunda yaGalilea! Ovo ve li omutumba popepi naye ovahongwa vaye. Okwa li a hoolola ovayapostoli 12 mokati kovahongwa vaye. Ovayapostoli ova li ovahongwa vaJesus ve likalekelwa. Mbela ou shii omadina avo?

Omadina ovayapostoli vaJesus 12 oo aa: Simon Petrus nomumwaina Andreas, Jakob nomumwaina Johannes. Omuyapostoli umwe natango okwa li ha ifanwa Jakob naumwe okwa li ha ifanwa yo Simon. Ovayapostoli vavali ova li hava ifanwa Judas. Umwe okwa li Judas Iskariot namukwao oyoo kwa li ha ifanwa Tadeus. Opa li yo Filippus naNatanael (ou ha ifanwa yo Bartolomeus) nosho yo Mateus naTomas.

Eshi Jesus a aluka kuSamaria, okwa li a hovela okuudifa oshikando shotete ta ti kutya: ‘Ouhamba weulu owa ehena popepi.’ Mbela ou shi shii kutya ouhamba oo oshike? Ouhamba waKalunga oo epangelo lolelalela. Jesus oye ohamba yao. Ota ka pangela okudja meulu nota ka eta ombili kombada yedu. Ouhamba waKalunga otau ka ninga edu alishe oparadisa iwa.

Onghee hano, Jesus okwa li ta hongo ovanhu shi na sha nouhamba. Okwa li e va honga okwiilikana a ti: ‘Omu na okwiilikana ngaha: Tate yetu u li meulu, edina loye nali yapulwe. Ouhamba woye nau uye. Ehalo loye nali wanifwe kombada yedu yo ngaashi meulu.’ Ovanhu vahapu ohava ifana elikano olo tava ti: ‘Eindilo lOmwene wetu.’ Vamwe ohave li ifana tava ti: ‘Tate yetu.’ Mbela ou shii eilikano olo alishe?

Jesus okwa li yo a honga ovanhu shi na sha nanghee ve na okuungaunga novanhu vakwao. Okwa ti: ‘Keshe eshi mwa hala ovanhu ve shi mu ningile osho mu va ningila yo.’ Mbela i ho kala wa hala ovanhu va ungaunge naave pahole? Jesus okwa ti kutya otu na okuungaunga pahole novanhu vakwetu. Mbela itashi ka kala nande shitunhula eshi ovanhu aveshe moparadisa tava ka kala ve holafane?

Mateus etukulwa eti-5 fiyo eti-7; Mat 10:1-4.