Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 80

Oshiwana shaKalunga tashi di muBabilon

Oshiwana shaKalunga tashi di muBabilon

TALA kwaasho tashi ningwa po mefano olo! Ovaisrael otava di moukwatwa muBabilon. Osho osha ningwa konima yomido mbali lwaapo okudja eshi Babilon sha li sha kwatwa ko kOvamedia nokOvapersia. Mbela ova li va mangululwa ngahelipi? Olyelye a li e va mangulula?

Ova li va mangululwa kuKores, ohamba yOvapersia. Ndele ofimbo Kores ina dalwa, Jehova okwa hangwa a xunganeka nalenale shi na sha naye okupitila momuprofeti Jesaja, a ti: ‘Oto ka ningila nge osho nda hala. Omivelo doshilando oto ka hanga da fyaala da yeuluka opo u dule okukwata ko oshilando.’ Kores oye a li omuwiliki wetanga lovakwaita olo la kwata ko Babilon, ngaashi ashike Jehova a li a xunganeka. Ovamedia nOvapersia ova li ve uya moshilando oufiku va hanga omivelo da fyaala da yeuluka.

Omuprofeti Jesaja okwa li yo a xunganeka kutya Kores ota ka yandja elombwelo opo Jerusalem notembeli yasho i tungululwe. Mbela Kores okwa li ngoo a yandja elombwelo la tya ngaho? Heeno, osho a li a ninga. Okwa lombwela Ovaisrael a ti: ‘Indeni paife ngaha kuJerusalem mu ka tungulule otembeli yaJehova, Kalunga keni.’ Nomolwaasho, ou wete mefano omo eshi Ovaisrael tava shuna kedu lavo.

Kakele kaasho, Ovaisrael vamwe kava li tava dulu okuya molweendo olo lile lokushuna kuJerusalem. Olweendo olo ola li lile neenghono, tali pula okweenda eekilometa 800 lwaapo. Ovanhu vahapu ovakulupe, ofimbo vamwe ovanaudu, nomolwaasho itava dulu okulitwika molweendo olo lile. Natango, vamwe kava li tava dulu okushuna omolwomatomheno amwe e lili. Onghee hano, Kores okwa lombwela Ovaisrael ovo itava dulu okuya a ti: ‘Yandjeni oisilveri noshingoli kovanhu ovo tava i va ka tungulule Jerusalem notembeli yasho.’

Ovaisrael ovo va li tava shuna kuJerusalem ova li va pewa eeshali dihapu. Kores okwa li yo e va pa oiyasha nomaholo enya a kufilwe kuNebukadnesar motembeli yaJehova eshi a hanauna po Jerusalem. Kungaho, Ovaisrael ovo ova li ve na okutwaalela eendongelwa dihapu.

Ova kala molweendo olo oule weemwedi nhatu nova ka fika naanaa peufwafimbo. Osho osha hala kutya Ovaisrael ova ka alukila kuJerusalem konima yomido 70 okudja eshi Jerusalem sha li sha hanaunwa po. Jerusalem osha kala eputu oule womido adishe odo. Ovaisrael ovo va li va alukila kedu lavo ova li va shakeneka omaupyakadi mahapu ngaashi hatu ke shi mona komesho.

Jesaja 44:28; 45:1-4; Esra 1:1-11.