Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 81

Ovaisrael ova li ve lineekela Jehova

Ovaisrael ova li ve lineekela Jehova

OVAISRAEL ovo va li va dja moukwatwa muBabilon nokuya molweendo lile lokushuna kuJerusalem ova li omayovi mahapu. Ndele eshi va fika, ova hanga Jerusalem sha ninga onduba inene yomakulukuma. Kamwa li omunhu nande oumwe. Onghee hano, Ovaisrael ova li ve na okuhovela vali okutungulula oshilando shavo.

Ndele oshinima shotete osho va li va hovela okutunga osha li oaltari. Oaltari onhele oko Ovaisrael va li hava xwikile omayambo oinamwenyo oyo va li hava yambele Jehova. Konima yeemwedi donhumba, ova li va hovela okutunga otembeli. Ndelenee ovatondi vOvaisrael vomoishiindalongo kava li va hala Ovaisrael va tunge otembeli. Onghee hano, ova li va ninga eenghendabala opo va ye moshipala oilonga yokutunga. Hauxuuninwa, ovatondi ovo ova li va indila ohamba ipe yaPersia i tote po omhango oyo tai shilike oilonga oyo.

Oilonga yokutunga oya li ya shilikwa oule womido donhumba. Opo nee, konima yomido 17 okudja eshi Ovaisrael va dja moukwatwa, Jehova okwa li a tuma ovaprofeti vaye vavali, Haggai naSakaria, va ka lombwele oshiwana kutya nashi hovele natango okutunga otembeli. Oshiwana osha li she lineekela ekwafo laKalunga nosha li sha dulika ketumwalaka lovaprofeti ovo. Onghee hano, Ovaisrael ova li va hovela natango oilonga yokutungulula otembeli nonande omhango oyo ya li ya shilika oilonga yavo inai kufwa po.

Efiku limwe, omunambelewa umwe Omupersia wedina Tattenai okwe ke uya kOvaisrael ndele te va pula kutya olyelye e va pa epitikilo lokutunga otembeli. Ovaisrael ove mu lombwela kutya fimbo va li muBabilon, ohamba Kores oya li ye va lombwela ya ti: ‘Indeni paife ngaha kuJerusalem mu ka tungulule otembeli yaJehova, Kalunga keni.’

Okudja opo, Tattenai okwa ka shangela onhumwafo kuBabilon ta pula ngeenge nakufya Kores okwa li a yandja shili elombwelo la tya ngaho. Meni lokafimbo kaxupi, ohamba ipe yaPersia oya li ya alula onhumwafo yaTattenai. Oya li ya dimina kutya heeno Kores osho a li a lombwela shili Ovaisrael. Kakele kaasho, ohamba oyo oya li ya lombwela Tattenai ya ti: ‘Efeni Ovaisrael va tunge otembeli yaKalunga kavo. Va kwafeleni.’ Otembeli oya li ya pwa okutunga moule womido nhee lwaapo. Onghee hano, Ovaisrael ova li va hafa neenghono.

Konima yomido 48 lwaapo okudja eshi otembeli ya li ya pwa okutungwa, oshilando notembeli yasho oya li tai monika nai. Natango, ovakalimo vomuJerusalem ova li va hepa neenghono. Ndele Omuisrael umwe wedina Esra, oo kwa li ha kala muBabilon, okwa li a uda kutya otembeli yaKalunga oya pumbwa okuwapekululwa. Mbela ou shi shii kutya Esra okwa li a ninga po shike?

Pefimbo opo, Persia osha li tashi pangelwa kohamba iwa yedina Artasasta. Eshi Esra a ka pula ekwafo kohamba oyo, ohamba oya li ya pa Esra eeshali dihapu a twaalele kuJerusalem. Onghee hano, Esra okwa li a pula Ovaisrael ovo va li va fyaala muBabilon ve mu kwafele mokuhumbata eeshali odo noku di twala kuJerusalem. Ovanhu 6 000 ova li va dimina okuya pamwe naye. Ova li va humbata oshingoli noshisilveri shihapu noinima ikwao yondilo.

Ndele nande ongaho, Esra okwa li te lipula unene shi na sha novakolokoshi ovo tashi dulika tava ka shakeneka lwopokati opo. Ovakolokoshi va tya ngaho otashi dulika va nyeke ko oshingoli noshisilveri, ndele tave va dipaa. Onghee hano, Esra okwa ongela ovanhu aveshe ngaashi u shi wete mefano olo, ndele tava ilikana kuJehova a kale pamwe navo eshi tava i molweendo olo lile lokushuna kuJerusalem.

Jehova okwa li e va amena molweendo olo leemwedi nhee fiyo osheshi va fika nombili muJerusalem. Mbela osho itashi ulike kutya Jehova oha dulu okwaamena ovapiya vaye ovo ve mu lineekela?

Esra etukulwa eti-2 fiyo eti-8.