Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 79

Daniel mekololo leenghoshi

Daniel mekololo leenghoshi

AKUTU HEWA! Daniel ita monika tuu a fa e li moupyakadi neenghono! Ndele nande ongaho, eenghoshi kadi na eshi tadi mu ningi. Mbela ou shi shii kutya omolwashike? Mbela olyelye a umbila Daniel mokati keenghoshi adishe odo? Natu ka taleni kutya osha li sha enda ngahelipi opo Daniel a ekelwe mekololo leenghoshi.

Pefimbo olo, Babilon osha li tashi pangelwa kohamba Darius. Darius okwa li e hole Daniel neenghono, molwaashi Daniel okwa li omunanghenda nomunaendunge. Darius okwa li a yela Daniel a ninge elenga la kula mouhamba waye. Ndele osho osha li sha ningifa ovalumenhu vamwe vomouhamba va kale va twila Daniel ondubo. Onghee hano, ova konga po ondungediladilo tai landula.

Ova ya kuDarius ndele tava ti: ‘Ohamba, otwa udafana u tule po omhango oyo tai ufa kutya moule womafiku 30 taa landula, hamunhu nande oumwe ta ka ilikana kalunga umwe ile omunhu umwe e lili, kakele koye ohamba. Nakeshe ou ita dulika kelombwelo olo oku na okweekelwa mekololo leenghoshi.’ Darius ka li a nongela kutya omolwashike ovalumenhu ovo va li va hala pa totwe omhango ya tya ngaho. Kakele kaasho, okwa li ta diladila kutya ondunge oyo oiwa, nomolwaasho okwa ufa omhango oyo i tulwe moilonga. Kungaho, omhango oyo kaya li vali tai dulu okulundululwa.

Eshi Daniel a uda kutya opa totwa omhango ya tya ngaho, okwa ya keumbo ndele ta ka ilikana kuJehova ngaashi ha ningi shito. Ovalumenhu ovo ovakolokoshi ova li ve shi shii kutya Daniel ita efa po okwiilikana Jehova. Onghee hano, ova li va hafa, molwaashi ova li tava diladila kutya ondungediladilo yavo yokudipaifa Daniel oya li tai ka pondola.

Eshi ohamba Darius ya mona kutya mboli omolwashike ovalumenhu ovo va tota omhango oyo, okwa li she mu udifa nai neenghono. Ndele nande ongaho, ka li ta dulu vali okulundulula omhango. Onghee hano, okwa li ashike e na okuyandja elombwelo kutya Daniel na ekelwe mekololo leenghoshi. Ashike ohamba oya lombwela Daniel tai ti: ‘Onde lineekela kutya Kalunga ou ho longele ote ke ku xupifa.’

Darius okwa li a handuka neenghono nokwa li nokuli a londokwa keemhofi. Ongula eshi kwa sha, okwa lotokela kekololo leenghoshi. Mbela ou mu wete mefano pombada penya? Okwa li ta ingida mokule ta ti: ‘Daniel, omupiya waKalunga omunamwenyo! Kalunga ou ho longele okwa dula tuu oku ku xupifa mokanya keenghoshi?’

Daniel okwe mu nyamukula a ti: ‘Kalunga okwa tumina nge omweengeli waye, ndele ta matifa omakanya eenghoshi, nomolwaashi kadi na eshi da ninga nge.’

Ohamba oya li ya hafa neenghono. Opo nee oya yandja elombwelo kutya Daniel na kufwe mo mekololo leenghoshi nonokutya ovalumenhu ovo va li va hala okudipaifa Daniel nava ekelwe mekololo leenghoshi. Ndele fimbo ovalumenhu ovo inave lidenga pedu, eenghoshi ode va nukila ndele tadi teyaula omakipa avo.

Opo nee Darius okwa shangela ovanhu aveshe vomouhamba waye, a ti: ‘Ohandi yandje elombwelo eli kovanhu aveshe kutya nava fimaneke Kalunga kaDaniel. Oha longo oikumwifilonga inene. Okwa xupifa Daniel mokanya keenghoshi.’

Daniel 6:2-29.