Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 59

David ta i onhapo

David ta i onhapo

KONIMA eshi David a dipaa Goljat, okwa li a twalwa kuSaul komukulunhu wetanga lovakwaita vaIsrael, ondjai yedina Abner. Saul okwa li a hokwa David neenghono. Nomolwaasho Saul okwa ninga David umwe womovakulunhu metangakwaita laIsrael nokwa kufa David a ka kale yo ha di mombala yaye.

Efiku limwe, eshi ovakwaita va aluka kolwoodi olo va li va ka lwa nOvafilisti, ovakainhu ova li tava imbi tava ti: ‘Saul okwa dipaa eyovi, ndele David okwa dipaa omayovi omulongo.’ Osho osha li sha ningifa Saul a twile David ondubo, molwaashi David okwa li ta pewa efimano lihapu li dule laye. Ashike omonamati waSaul, Jonatan, ka li a twila David ondubo ngaashi xe. Jonatan okwa li e hole David neenghono, nosho yo David okwa li yo e hole Jonatan. Onghee hano, David naJonatan ova li va panga oukaume nova ninga eudafanotwokumwe kutya oukaume wavo otau kalelele.

David okwa li e shii nawa okushika okahumbafeta, na Saul okwa li ha kala a hafa ngeenge David te mu shikile okahumbafeta. Efiku limwe, Saul okwa li a ninga oshinima shii neenghono, molwaashi okwa li a twila David ondubo. Fimbo David a li ta shiki okahumbafeta, Saul okwa kufa eonga laye ndele te li umbu David, ta ti: ‘David ohandi ku twile kekuma.’ Ndelenee David eonga okwe li hepa, ndele tali mu shekuna. Pomhito vali imwe, Saul okwa li a kendabala okutwila David kekuma, ndele David eonga okwe li hepa natango. Okudja opo, David okwa li a mona kutya oku na okukala a lungama.

Mbela oto dimbuluka kutya Saul okwa li a udanekela David shike? Okwa li a udaneka kutya ota ka yandja okamonakadona kaye ka hombolwe po komulumenhu ou ta dipaa Goliat. Ndele lwanima, Saul okwa ka lombwela David kutya ota dulu ashike oku mu pa okamonakadona kaye Mikal ngeenge okwa dipaa tete ovatondi vavo Ovafilisti ve li 100. Paulelalela, Saul okwa li a hala David oka dipaelwe molwoodi kOvafilisti. David okwa li a ninga ngaashi Saul e mu lombwela, ndele ina dipawa kOvafilisti. Onghee hano, Saul okwa ka pa ngoo nee David okamonakadona kaye ka ninge omukulukadi waye.

Efiku limwe, Saul okwa li a lombwela Jonatan nosho yo ovapiya vaye aveshe kutya okwa hala okudipaa David. Ndele Jonatan okwa lombwela xe a ti: ‘Ino yahameka nande David. Ine ku longela nande onale owii washa. Ponhele yaasho, keshe eshi David a ninga, okwe shi ninga molwouwa woye. Okwa li nokuli a tula omwenyo waye moshiponga eshi a li a ka lwifa Goljat. Naashi wa mona kutya David okwa dipaa Goljat, owa li wa hafa neenghono.’

Saul okwa li a pwilikina komayele omonamati waye, nokwa li a udaneka kutya ita ka yahameka David nandenande. Konima yaasho, David okwa ka talwa vali, ndele ta twikile okulongela Saul meumbo laye ngaashi shito. Ndele efiku limwe fimbo David a li ta shiki okahumbafeta, Saul okwa kufa natango eonga ndele ta umbu David. Opo nee David eonga okwe li hepa natango, ndele tali ka panda mekuma. Ngaho osha li oshikando oshititatu, nomolwaasho David okwa tokola okuya onhapo.

Oufiku oo David okwa li a ya keumbo laye oko a ka nangale, ndele Saul okwa li a tuma ovalumenhu vonhumba ve ke mu dipae. Lao linene, Mikal okwa li a uda kombinga yomhangela yaxe, nomolwaasho okwa ka lombwela omushamane waye, David, a ti: ‘Ngeenge ito faduka po oufiku wonena, oto fitikininwa mo meumbo ndele to dipawa.’ Efiku olo Mikal okwa xupifa David, e mu pitifa mekende, opo a dule okuya onhapo oufiku oo tuu oo. David okwa ka kala ta kongo ouhondameno meenhele di lili noku lili oule womido heyali, opo aha monike kuSaul.

1 Samuel 17:55-58; 18:1-30; 19:1-18.