Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 64

Salomo ta tungu otembeli

Salomo ta tungu otembeli

DAVID fimbo ina fya, okwa li a pa Salomo omudutilo wotembeli oo a li a pewa kuJehova u na sha nanghee otembeli i na okutungwa. Salomo okwa hovela okutungila Jehova otembeli momudo omutine wokupangela kwaye. Otembeli oyo oya li ya pwa okutungwa moule womido heyali netata. Opa li ovalumenhu omayovi omilongo ovo va kufa ombinga mokutunga otembeli. Otembeli oyo oya li ya kosha ondilo okutungwa, molwaashi ova li tava longifa oshingoli noshisilveri shihapu.

Ngaashi ashike etwalihangano, otembeli nayo oya li i na omadimo avali a fimana. Ashike omadimo otembeli okwa li manene e dule aa etwali lwomapa avali. Salomo okwa li a unganeka opo oshikefa shehangano shi tulwe medimo lotembeli olo la li linini kulikwao.

Opa li pa ningwa oshivilo sha kula eshi otembeli ya pwa okutungwa. Pomhito oyo, Salomo okwa li a twa eengolo komesho yotembeli ndele ta ilikana kuJehova, ngaashi u shi wete mefano olo la ama kolumosho. Okwa ilikana kuJehova a ti: ‘Otembeli ei oinini, ito dulu okukala mo, nokuli neulu lo vene inali ku wanena. Kalunga kange, ohandi ku indile u ude omailikano oshiwana shoye, ngeenge tashi ku ilikana sha taalela kotembeli ei.’

Ohaluka, eshi Salomo a mana okwiilikana, meulu omwa dja omundilo, ndele tau lungwinifa po omaxwikiloyambo oinamwenyo. Otembeli aishe oya li ya yadifwa oshinge shaJehova. Osho osha li euliko kutya Jehova okwa li a pwilikina kuSalomo nokwa li a hokwa otembeli neilikano laSalomo. Ovanhu okwa li hava i va ka ilikane Jehova kotembeli, oyo ya pingena po etwali.

Salomo okwa kala ta pangele nawa oule wefimbo lile, novanhu ova li va hafa. Ndele okwa ka hombola ovakulukadi ovanailongo vahapu ovo va li ihava longele Jehova. Mbela ou wete omukulukadi umwe mefano kolulyo ta ilikana oshihongwafano? Hauxuuninwa, ovakulukadi vaSalomo ove mu ningifa naye a kale ta ilikana oikalunga. Mbela ou shi shii kutya oshike sha li sha ningwa po eshi Salomo a hovela okulongela oikalunga? Ka li ha ungaunga vali novanhu nonghenda, molwaashi okwa li a ninga omukwanyanya. Nomolwaasho, oshiwana osha li sha kanifa ehafo lasho.

Kakele kaasho, osho Salomo a li a ninga osha li sha handukifa Jehova, ndele ta lombwele Salomo ta ti: ‘Ohandi ke ku kufa ouhamba, ndele handi u yandje po komunhu umwe. Osho itandi ke shi ninga fimbo u li momwenyo, ndele ohandi ke shi ninga pefimbo lokupangela kwomonamati woye. Ashike itandi ka kufa omona woye ouhamba aushe noshiwana ashishe.’ Natu ka taleni kutya osho osha li sha wanifwa ngahelipi.

1 Omafimbo 28:9-21; 29:1-9; 1 Eehamba 5:1-18; 2 Omafimbo 6:12-42; 7:1-5; 1 Eehamba 11:9-13.