Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 65

Ouhamba waIsrael tau tukulwa pokati

Ouhamba waIsrael tau tukulwa pokati

MBELA ou shi shii kutya omolwashike omulumenhu oo e li mefano ta pombola po oshikutu shaye moipambu? Jehova oye e mu lombwela a pombole po oshikutu shaye. Omulumenhu oo omuprofeti waKalunga. Edina laye oAhia. Mbela ou shi shii kutya omuprofeti oshike? Omuprofeti omunhu oo ha lombwelwa kuKalunga komesho yefimbo oinima oyo tai ka ningwa monakwiiwa.

Mefano olo, Ahia ota popi naJerobeam. Jerobeam omulumenhu oo Salomo a tula po a kale ta pashukile oilonga yaye imwe yokutunga. Eshi Ahia va shakena naJerobeam mondjila, Ahia okwa li a ninga oshinima shikumwifi. Okwa dula mo oshikutu shaye shipe osho kwa li a djala ndele te shi pombola moipambu 12. Opo nee, okwa lombwela Jerobeam a ti: ‘Tambula oipambu 10, nai ninge po yoye.’ Mbela ou shi shii kutya omolwashike Ahia a pa Jerobeam oipambu 10?

Ahia okwa li a popya kutya Jehova ota ka kufa Salomo ouhamba. Okwa ti yo kutya Jehova ota ka pa Jerobeam omapata 10 aIsrael. Kungaho, osha yela kutya omonamati waSalomo, Rehabeam, ota ka fyaala po ashike nomapata avali oo ta ka pangela.

Eshi Salomo a uda kombinga yaasho Ahia a lombwela Jerobeam, Salomo okwa li a handuka neenghono. Okwa li ta kendabala nokuli okudipaa Jerobeam. Ndele Jerobeam okwa ya onhapo kuEgipti. Salomo okwa ka fya konima yokafimbo. Okwa li a pangela oule womido 40. Omonamati waye Rehabeam oye a ka ningwa ohamba ponhele yaye. Ndele eshi Jerobeam a uda kutya Salomo okwa fya, okwa dja ko kuEgipti ndele ta alukile kuIsrael.

Rehabeam ka li ohamba iwa. Okwa li nokuli omukwanyanya e dule xe Salomo. Efiku limwe, Jerobeam novakulunhu vonhumba va fimana ova li va ya kohamba Rehabeam ndele tave i pula i kale tai ungaunga novanhu nawa. Ndele Rehabeam ka li a pwilikina kuvo. Okwa li nokuli a ninga omukwanyanya shi dulife nale. Onghee hano, ovanhu ova ninga Jerobeam ohamba yomapata 10, ashike epata laBenjamin nepata laJuda okwa li a tokola okukala koshi youhamba waRehabeam.

Jerobeam ka li a hala oshiwana shi kale tashi i kuJerusalem shi ka ilikane Jehova kotembeli. Onghee hano, okwa ninga eenhana mbali doshingoli nokwa xwaxwameka ovanhu vomouhamba womapata 10 va kale tava ilikana kudo. Diva, edu ola li la yada ominyonena nelongifo leenghono.

Ouhamba womapata avali nao owa li wa hangwa koupyakadi. Konima yomido nhee nasha okudja eshi Rehabeam a ninga ohamba, ohamba yaEgipti oya li ye uya okuhomona Jerusalem. Ohamba oyo oya li ya kufa mo omamona mahapu motembeli yaJehova. Kungaho, otembeli oya li ashike monghalo iwa oule wokafimbo kanini okudja eshi ya pwa okutungwa.

1 Eehamba 11:26-43; 12:1-33; 14:21-31.