Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 56

Saul ta vaekwa a ninge ohamba yotete yaIsrael

Saul ta vaekwa a ninge ohamba yotete yaIsrael

TALA eshi Samuel ta tile omaadi momutwe waSaul. Omunhu osho kwa li ha vaekwa ngaho ngeenge a hoololwa a ninge ohamba. Jehova oye a li a tuma Samuel a ka vaeke Saul momutwe omaadi edimba liwa. Omaadi oo okwa li omaadi e na edimba liwa.

Saul okwa li ta diladila kutya ye ina wana okuninga ohamba. Okwa lombwela Samuel a ti: ‘Ame onda dja mepata laBenjamin, epata olo linini komapata aeshe omuIsrael. Omolwashike to tile kutya ohandi ka ninga ohamba?’ Jehova okwa li a hokwa Saul, molwaashi Saul ka li e litala ko munene ile a fimana unene. Nomolwaasho, Jehova okwe mu hoolola a ninge ohamba.

Ndele Saul ka li omufyoona ile omunhu wofika ixupi. Okwa li a dja moukwaneumbo wa punapala, nokwa li omulumenhu e na omufika mule nondjelo iwa. Okwa li mule e dule ovanhu aveshe muIsrael. Saul okwa li yo e na onhapo, nokwa li yo omunaenghono. Ovaisrael ova li va hafa eshi Jehova a hoolola Saul oye a ninge ohamba yavo. Onghee hano, aveshe ova li tava ingida pombada, tava ti: ‘Ohamba nai kale nomwenyo mule!’

Pefimbo olo, ovatondi vOvaisrael ova li ve va dule eenghono. Ova li tava hepeke natango Ovaisrael. Diva konima eshi Saul a vaekwa a ninge ohamba, Ovaamon ova li ve uya okulwifa Ovaisrael. Ndele Saul okwa li a ongela etangakwaita linene, nokwa li a finda Ovaamon molwoodi. Ovanhu ova li va hafa eshi Saul a li ta pangele.

Saul okwa li a findana momalwoodi mahapu oule wefimbo. Okwa li yo e na omonamati ependa, edina laye Jonatan. Jonatan naye okwa li a kwafela Ovaisrael va findane momalwoodi mahapu. Kakele kaasho, Ovafilisti ova li natango ovatondi vanene vOvaisrael. Efiku limwe, Ovafilisti omayovi mahapu ova li ve uya okulwifa Ovaisrael.

Samuel okwa li a lombwela Saul kutya oku na oku mu teelela a yambele Jehova oshali yexwikiloyambo fimbo Ovaisrael inava ka lwifa ovatondi vavo. Ndele Samuel fiku olo okwa li a kwata olule okuuya. Molwaashi Saul okwa li a tila kutya Ovafilisti pamwe otave uya oku va ponokela, okwa li a tokola a ninge exwikiloyambo ye mwene. Hauxuuninwa eshi Samuel a fika, okwa lombwela Saul kutya ina dulika kuJehova. Samuel okwa lombwela Saul a ti: ‘Jehova ota ka hoolola omunhu umwe oo ta ka ninga ohamba ponhele yoye.’

Natango, pomhito imwe vali Saul ka li a dulika kuJehova. Onghee hano, Samuel okwa lombwela Saul a ti: ‘Oshixwepo okudulika kuJehova shi dulife oku mu ningila exwikiloyambo lodi ya ondoka. Ito ka kala vali omupangeli waIsrael, molwaashi iho dulika kuJehova.’

Ohatu dulu okulihonga oshilihongomwa sha fimana moshiningwanima osho. Ohatu lihongo mo kutya osha fimanenena okukala alushe hatu dulika kuJehova. Ohatu lihongo mo yo kutya, omunhu oo kwa li muwa ngaashi Saul, naye ota dulu okuninga omunhu mwii. Mbela nafye otwa hala okuninga ovalongi vowii?

1 Samuel etukulwa eti-9 fiyo eti-11; 1 Sam 13:5-14; 14:47-52; 15:1-35; 2 Samuel 1:23.