Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 63

Ohamba inaendunge Salomo

Ohamba inaendunge Salomo

SALOMO okwa li a ninga ohamba ofimbo a li e na omido omulongo nasha. Okwa li e hole Jehova nokwa li ha dulika komayele mawa axe David. Jehova okwa li a hokwa Salomo. Onghee hano, efiku limwe fimbo Salomo a li a kofa, Jehova okwe mu pula okupitila mondjodi, a ti: ‘Salomo, owa hala ndi ku pe shike?’

Salomo okwa nyamukula a ti: ‘Jehova Kalunga kange, ame omunyasha natango. Kandi shii nhumbi ndi na okulela oshiwana shoye. Onghee hano, pe nge eendunge nounongo opo ndi dule okupangela oshiwana shoye monghedi ya yuka.’

Jehova okwa li a panda osho Salomo a indila. Onghee hano, okwa lombwela Salomo a ti: ‘Molwaashi owa indila nge ndi ku pe eendunge nounongo, ndele hamwenyo mule ile oupuna, ohandi ke ku pa eendunge nounongo muhapu u dule wovanhu aveshe vokombada yedu. Ndele ohandi ke ku pa yo oinima imwe oyo ino indila, ngaashi oupuna nefimano.’

Konima ashike yefimbo lixupi, ovakainhu vavali ova li ve uya kuSalomo ve na oupyakadi wa kwata moiti. Omukainhu umwe okwa hokolola eshi sha li sha ningwa po, a ti: ‘Ame nomukainhu ou, ohatu di meumbo limwe. Tete, onda dala okaana okamati, ndele konima yomafiku avali, mukwetu naye okwa dala okaana okamati. Ndele efiku limwe, okaana kaye oka fya oufiku. Fimbo nda li nda kofa, okwa tula okaana kaye aka ka fya mekolo lange, ndele ta kufa po okaana kange. Eshi nda penduka, onda mona kutya okaana aka ke li mekolo lange oka fya. Ashike eshi nde ka tala nawa, onda mona kutya mboli okaana aka ka fya kake fi kange.’

Konima eshi a mana okupopya, omukainhu mukwao okwa ya mo ta ti: ‘Ahowe! Okaana aka ke na omwenyo okange, ndele aka ka fya oko kaye!’ Natango, omukainhu ou a hovela okupopya okwa nyamukula a ti: ‘Ahowe! Okaana aka ka fya okoye, ndele aka ke na omwenyo okange!’ Ovakainhu ovo ova twikila nokutwa eemhata. Mbela Salomo okwa li a ninga po shike?

Salomo okwa tuma ovapiya vaye va ka tale eongamukonda. Eshi eongamukonda la etwa, Salomo okwa ti: ‘Okaana aka ke na omwenyo ka teteni pokati, ombinga imwe tamu i pe omukainhu ou, nombinga ikwao i peni omukainhu winya.’

Ina yokaana aka ke na omwenyo okwa hovela okulila, ndele ta ti: ‘Ahowe! Akutu, inamu dipaa okahanana. Ka yandjeni ashike kuye!’ Ndele omukainhu ou ehe fi shili ina yokaana okwa ti: ‘Inaka pewa nande oumwe womufye; ka teteni ashike pokati.’

Hauxuuninwa, Salomo okwa lombwela ovapiya vaye a ti: ‘Inamu dipaa okaana! Ka peni omukainhu winya a hovela okupopya, osheshi oye shili ina yokaana.’ Salomo okwa li a mona kutya ina yokaana elipi, molwaashi ina yokaana okwa li e hole okaana kaye neenghono nokwa li a tokola oku ka yandja po kumukwao opo kaha dipawe. Ovanhu eshi va uda nhumbi Salomo a kandula po oupyakadi oo, ova li va hafa neenghono eshi ve na ohamba inaendunge.

Pefimbo lokupangela kwaSalomo, Kalunga okwa li a nangeka noupuna oshiwana shaye. Edu ola li la hali menifa oilya ihapu. Omiviinyu nomikwiyu oda li hadi ima nawa. Opa li yo oikulya ikwao yomaludi mahapu. Ovanhu ova li hava djala oikutu iwa nova li hava kala momaumbo mawa. Ova li ve na keshe osho va li va pumbwa monghalamwenyo.

1 Eehamba 3:3-28; 4:29-34.