Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 67

Josafat okwa li e lineekela Jehova

Josafat okwa li e lineekela Jehova

MBELA ovalumenhu ovo ve li komesho yovakwaita mefano olo ovo oolyelye notava ningi shike? Ovalumenhu ovo ovaimbi vomuIsrael tava i kolwoodi nove kwetele komesho ovakwaita. Ndele otashi dulika u pule kutya: ‘Omolwashike ovaimbi vehe na omaongamukonda nomaonga oku ka lwa nao? Natu ka taleni kutya omolwashike.

Pefimbo olo, Josafat oye a li ohamba youhamba womapata avali aIsrael. Josafat okwa li ko pefimbo limwe nohamba Ahab yomapata 10 aIsrael nohambanghainhu Isebel. Ndele Josafat okwa li ohamba iwa, ngaashi xe Asa. Onghee hano, ouhamba wokolukadi womapata avali owa kala tau hafele onghalamwenyo oule womido dihapu.

Ndele opa ka ningwa oshinima osho sha li sha tilifa ovanhu. Efiku limwe, Josafat okwa li a tuminwa ovatumwa, tava ti: ‘Otaku di etangakwaita la kula lOvamoab, Ovaammon novakwaita va dja keemhunda daSeir, tave uya oku ku ponokela.’ Ovaisrael vahapu ova li va ka ongala kuJerusalem nokupula ekwafo kuJehova. Eshi ve uya motembeli, Josafat okwa ilikana a ti: ‘Jehova Kalunga ketu! Fye katu shii kutya oshike tu na okuninga. Itatu dulu okukondjifa etangakwaita olo linene kufye vene. Otwa pumbwa ekwafo loye.’

Jehova okwa li a pwilikina keilikano laJosafat, nokwa li a lombwela oshiwana okupitila momupiya waye umwe a ti: ‘Olwoodi kali fi leni, ndele olaKalunga. Nye itamu ka lwa nande. Taleni ashike nhumbi Jehova te ke mu xupifa.’

Onghee hano, ongula yefiku la landula ko, Josafat okwa lombwela oshiwana a ti: ‘Kaleni mwe lineekela muJehova!’ Opo nee, Josafat okwa tula ovaimbi komesho yovakwaita vaye. Ovaimbi ovo ova enda tava imbile Jehova omaimbilohambelelo va yuka konhele yolwoodi. Mbela ou shi shii kutya oshike kwa li sha ningwa po eshi Ovaisrael ve uya popepi nonhele yolwoodi? Jehova okwa etifa edundakano mokati kovatondi vOvaisrael, nova hovela okudipaafana. Eshi Ovaisrael va fika ponhele opo, ova hanga ovatondi vavo aveshe va fya nale.

Mbela Josafat ka li a katuka pandunge eshi a li a tula elineekelo laye muJehova? Nafye ohatu ka ninga nawa ngeenge otwa kala twa tula elineekelo letu muJehova.

1 Eehamba 22:41-53 54; 2 Omafimbo 20:1-30.