Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 Ehokololo 72

Kalunga ta kwafele ohamba Hiskia

Kalunga ta kwafele ohamba Hiskia

MBELA ou shi shii kutya omolwashike omulumenhu oo ta ilikana kuJehova? Omolwashike a tula eenhumwafo odo komesho yoaltari yaJehova? Omulumenhu oo edina laye oHiskia. Hiskia okwa li ohamba youhamba waIsrael womapata avali okolukadi. Okwa li a hangwa koupyakadi wa kula. Oupyakadi owashike mbela?

Hiskia okwa li a taalelwa koupyakadi wa kula, molwaashi omatanga ovakwaita aAssiria okwa li a hanauna po ouhamba waIsrael wokolundume womapata 10. Jehova okwa li a efa ouhamba womapata 10 u hanaunwe po, molwaashi ovanhu ova li tava longo owii neenghono. Ndele lwanima, ovakwaita Ovaassiria ove ke uya ngeno okuponokela ouhamba womapata avali.

Ohamba yaAssiria oya hangwa opo ya tumine ohamba Hiskia eenhumwafo. Ndele Hiskia okwa twala eenhumwafo odo koshipala shaJehova Kalunga. Eenhumwafo odo oda li tadi sheke nai Jehova, noda li tadi ladipike Hiskia kutya ne liyandje ashike. Nomolwaasho u wete Hiskia mefano olo li li kolumosho ta ilikana kuJehova, ta ti: ‘Jehova, tu xupifa momake ohamba yOvaassiria. Opo nee, oiwana aishe otai ka shiiva nokutya oove auke Kalunga.’ Mbela Jehova okwa li a pwilikina keilikano laHiskia?

Hiskia okwa li ohamba iwa. Ka li ha longo owii ngaashi xe Ahas ile ngaashi eehamba dikwao douhamba waIsrael womapata 10. Hiskia okwa li ha diinine oipango aishe yaJehova. Onghee hano, konima eshi Hiskia a mana okwiilikana, omuprofeti Jesaja okwa li e mu tumina etumwalaka la dja kuJehova, tali ti: ‘Ohamba yaAssiria itai ka lyata mo nande omhadi muJerusalem. Kape na omukwaita wayo nande umwe ta ka ehena popepi naJerusalem. Itava ka umbila mo nande oshikuti shimwe ashike moshilando.’

Tala mefano olo li li kolulyo pedu! Mbela ou shi shii kutya ovakwaita aveshe ovo va fya oolyelye? Ovakwaita Ovaassiria. Jehova okwa li a tuma omweengeli waye umwe, ndele ta dipaa ovakwaita Ovaassiria ve li 185 000 moufiku umwe auke. Konima yoshiningwanima osho, ohamba yOvaassiria oya li ya sholola, ndele tai shuna koshilongo shavo.

Kungaho, ouhamba womapata avali owa li wa xupifwa, novanhu ova kala ve na ombili oule wefimbo. Ndele konima yokufya kwaHiskia, omonamati waye Manasse oye a li e mu pingena po. Ohamba Manasse nomonamati wayo Amon, aveshe ova li eehamba dii neenghono. Onghee hano, konima yefimbo oshilongo osha ka yada natango ekaulonyanga nelongifo leenghono. Ndele eshi Amon a dipawa kovapiya vaye, omonamati waye Josia oye a ninga ohamba youhamba womapata avali.

2 Eehamba 18:1-36; 19:1-37; 21:1-25.