Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 70

Jona noshi inene

Jona noshi inene

TALA komulumenhu oo e li momeva! Osha yela kutya omulumenhu oo oku li moshiponga, hasho mbela? Oshi oyo inene oya hala oku mu xwaka po. Mbela ou shi shii kutya omulumenhu oo oye lyelye? Edina laye oJona. Natu ka taleni kutya osha li sha enda ngahelipi opo Jona a ye moupyakadi u fike opo.

Jona okwa li omuprofeti waJehova. Konima yefimbo lixupi eshi omuprofeti Elisa a fya, Jehova okwa li a lombwela Jona a ti: ‘Inda koshilando shinene shedina Ninive! Ovanhu vomoshilando osho otava longo owii muhapu unene. Onda hala u ye ko u ke va londwele.’

Ashike Jona ka li a hala nande okuya kuNinive. Onghee hano, okwa londa oshikepa ya finda koilongo imwe i lili. Jehova ka li e shi uditile nawa eshi Jona a li ta faduka po. Onghee hano, okwa tukulula oshikungulu shinene mefuta. Oshikungulu osho osha li shidjuu neenghono, noshikepa oya li tai hale okuningina koshi yomeva. Ovaendifuta ovo va li moshikepa oyo ova li va tila neenghono, nova li va hovela okulila pombada tava kongo ekwafo kookalunga kavo.

Hauxuuninwa, Jona okwe va lombwela a ti: ‘Ame omupiya waJehova Kalunga, ou a shita eulu nedu. Onda li handi faduka po, molwaashi inandi hala oku ka ninga osho Jehova a lombwela nge.’ Ovaendifuta ove mu pula tava ti: ‘Otu na nee okuninga po shike opo oshikungulu shi lote?’

Jona okwe va nyamukula a ti: ‘Ekelei nge mefuta, opo nee efuta otali ka lotela.’ Ovaendifuta ovo kava li va hala oku mu ekela mefuta, ndele hauxuuninwa ove ke mu umbila mefuta molwaashi oshikungulu osha li tashi djuupala neenghono. Ohaluka, konima eshi va ekela Jona momeva, oshikungulu osha mwena nefuta ola lota.

Eshi Jona a ningina koshi yomeva, okwa dja oshi inene ndele tai mu pona po. Lao linene, ina fya. Onghee hano, okwa kala medimo loshi oyo oule womafiku atatu. Hauxuuninwa, Jona okwe ke livela ombedi, a dimina kutya okwa ninga nai eshi ina dulika kuJehova nokuya kuNinive ngaashi a li a lombwelwa. Mbela ou shi shii kutya Jona okwa li a ninga po shike?

Jona okwa li a ilikana kuJehova opo e mu kwafele. Onghee hano, Jehova okwa ningifa oshi i umbile Jona komutunda. Okudja opo, Jona okwa ka ya kuNinive. Mbela osho itashi tu hongo kutya osha fimana okukala hatu ningi alushe keshe osho Jehova te tu lombwele?

Embo lOmbibeli laJona 1-4.