Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 76

Jerusalem tashi hanaunanwa po

Jerusalem tashi hanaunanwa po

OPA li pa pita omido di dule 10 okudja eshi ohamba Nebukadnesar ya li ya twala ovahongwanhu aveshe vomuIsrael kuBabilon. Ndele paife tala kwaasho tashi ningwa po mefano olo! Jerusalem otashi xwikwa po, nOvaisrael ovo va xupa po otava twalwa moukwatwa kuBabilon.

Mbela oto dimbuluka eshi ovaprofeti vaJehova va kala tava londwele Ovaisrael kutya ngeenge itava lundulula eenghedi davo dii otava ka handukilwa? Ndele nande ongaho, Ovaisrael kava li va pwilikina komalondwelo ovaprofeti. Ova li va twikila okulongela oikalunga ponhele yokulongela Jehova. Onghee hano, oshiwana osha li sha wana okuhandukilwa. Osho otu shi shii molwaashi omuprofeti waJehova, Hesekiel, okwa popya kombinga yoixuna oyo ya li tai longwa kOvaisrael.

Mbela ou shi shii kutya Hesekiel okwa li lyelye? Hesekiel okwa li mokati kovalumenhu ovanyasha ovo va hangwa va twalwa nale kuBabilon kohamba Nebukadnesar komesho yomido da konda 10 ofimbo ehanauno olo linene laJerusalem la li inali fika. Ova li va twalwa kuBabilon pamwe naDaniel nookaume kaye vatatu Sadrak, Mesak naAbednego.

Fimbo Hesekiel a li muBabilon natango, Jehova okwa li e mu ulikila oixuna oyo ya li tai longwa kotembeli yaYe muJerusalem. Jehova okwa li a ulikila Hesekiel oinima oyo pashikumwifilonga. Nonande Hesekiel okwa li e li muBabilon, Jehova okwa li e mu ulikila keshe osho sha li tashi ningwa motembeli muJerusalem. Oixuna oi fike peni oyo Hesekiel a li a ulikilwa memoniko!

Jehova okwa li a lombwela Hesekiel a ti: ‘Tala koixuna oyo ovanhu tava longo motembeli yange. Tala kekuma eshi la fanekwa omayoka noinamwenyo ikwao. Tala yo eshi Ovaisrael tava ilikana koinima oyo!’ Hesekiel okwa li a dula okumona oinima oyo nokwa shanga oiningwanima oyo a li a mona.

Jehova okwa pula Hesekiel a ti: ‘Mbela ou wete osho ovawiliki vaIsrael tava longo monanguwi?’ Hesekiel okwa li e wete oixuna aishe oyo ya li tai longwa kovawiliki. Okwa li a mona ovalumenhu 70, ovo va li tava longele oikalunga. Ovalumenhu ovo ova li tava ti: ‘Jehova ke tu wete. Okwa dja mo moshilongo.’

Opo nee, Jehova okwa li a ulikila vali Hesekiel ovakainhu vamwe va li va ama komuvelo wotembeli wokolundume. Ovakainhu ovo ova li tava ilikana oshikalunga Tammus. Jehova okwa li yo a ulikila Hesekiel ovalumenhu 25 lwaapo, ovo va li poshivelo shotembeli. Ovalumenhu ovo ova li va nyongama va taalela koushilo tava ilikana etango.

Jehova okwa ti: ‘Ovanhu ovo inava fimaneka nge nandenande. Itava longo ashike owii, ndele ova ya va ka longele oilonga ii kotembeli yange!’ Onghee hano, Jehova okwa li a udaneka a ti: ‘Otava ka uda oupyuhandu wange. Ndele itandi ke va fila nande onghenda eshi tava ka hanaunwa po.’

Konima eshi pa li pa pita konyala oule womido nhatu okudja eshi Jehova a li a ulikila Hesekiel oiningwanima oyo, Ovaisrael ova li va tukululila ohamba Nebukadnesar oshibofa. Onghee hano, Nebukadnesar okwe ke va lwifa. Ndele konima yomudo umwe netata, Ovababilon ova li va teyaula po omakuma aJerusalem ndele tave shi xwike po filufilu. Ovanhu vahapu ova li va dipawa, ofimbo vamwe va li va twalwa moukwatwa kuBabilon.

Omolwashike Jehova a li a efa Ovaisrael va hanaunwe po monghedi oyo inyanyalifi? Omolwaashi kava li va pwilikina kuye nokava li va dulika koipango yaye. Osho otashi tu hongo kutya osha fimanenena okukala hatu longo alushe osho Jehova Kalunga te tu lombwele.

Potete, omuvalu munini wovanhu owa li wa pitikwa u kale muIsrael. Ohamba Nebukadnesar oya li ya tula po omupashukili Omujuda wedina Gedalja a kale omupangeli wavo. Ndele lwanima, Gedalja okwa ka dipawa kOvaisrael vamwe. Onghee hano, ovanhu ovo va li muJerusalem ova li va tila kutya pamwe Ovababilon otava ka aluka vali ndele tave va dipaa po aveshe omolwoshinima shii osho sha ningwa po. Okudja opo, Ovaisrael ovo ova li va fininika Jeremia a ye onhapo pamwe navo kuEgipti.

Kungaho, Israel osha li sha ninga eputu; kamwa li omunhu nande oumwe. Osha kala shihe na ovanhu oule womido 70. Ndele nande ongaho, Jehova okwa li a udaneka kutya ota ka alulila oshiwana shaye kedu lasho konima yomido 70. Ndele mbela oshike sha kala tashi ningilwa Ovaisrael fimbo va li moukwatwa muBabilon? Natu ke shi taleni momahokololo taa landula.

2 Eehamba 25:1-26; Jeremia 29:10; Hesekiel 1:1-3; 8:1-18.