Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 66

Ohambanghainhu ikolokoshi Isebel

Ohambanghainhu ikolokoshi Isebel

KONIMA eshi ohamba Jerobeam ya fya, eehamba adishe da ka landula ko odo da kala tadi pangele ouhamba womapata 10 aIsrael oda li dii. Ohamba Ahab oya li ohamba ii neenghono inaku shiya vali. Mbela ou shi shii kutya omolwashike? Oshinima osho sha li sha ningifa unene Ahab a kale ohamba ii neenghono omukulukadi waye, ohambanghainhu ikolokoshi yedina Isebel.

Isebel ka li Omuisrael; okwa li omonakadona wohamba yOvasidon. Okwa li ha ilikana oshikalunga Baal nokwa li a ningifa Ahab nOvaisrael vahapu va kale tava ilikana Baal. Isebel okwa li e tonde Jehova nokwa li a dipaifa ovaprofeti vaJehova vahapu. Ovaprofeti vamwe ova li nokuli va ka hondama momakololo opo vaha dipawe. Ngeenge Isebel a li a hala oshinima shonhumba, okwa li ha dipaa omunhu oo e shi kwete opo e shi mone.

Efiku limwe, ohamba Ahab oya li ya handuka nai. Opo nee Isebel okwe i pula a ti: ‘Omolwashike wa handuka nena?’

Ahab okwa nyamukula a ti: ‘Onda handuka, molwaashi onda li nda hala okulanda po oshikokola shomiviinyu shaNabot, ndele Nabot okwe shi anyena nge.’

Isebel okwa lombwela Ahab a ti: ‘Ino kala wa nyemata. Ohandi shi ku monene.’

Okudja opo, Isebel okwa ka shangela ovakulunhu vomoshilando omo hamu di Nabot onhumwafo, a ti: ‘Kongeni ovalumenhu vonhumba ovakolokoshi, ndele tava lundile Nabot kutya okwa tuka Kalunga nohamba. Opo nee, pitifeni mo Nabot moshilando, ndele tamu mu dipaa nomamanya.’

Eshi ngoo Isebel a uda kutya Nabot okwa fya, okwa ka lombwela Ahab ta ti: ‘Inda nee u ka kufe po oshikokola shaye shomiviinyu.’ Mbela ito dimine kutya Isebel okwa wana okuhandukilwa omolwoshinima shinyanyalifi osho a ninga?

Konima yefimbo, Jehova okwa li a tuma omulumenhu wedina Jehu a ka katukile Isebel onghatu. Eshi Isebel a uda kutya Jehu ote uya kombala, okwe livaeka kombada yomesho omaluvala nokwe liwapeka momutwe opo a kale ta monika nawa. Ndele eshi Jehu a fika, okwa talela Isebel mekende nokwa ingida ovalumenhu ovo va li mombala, a ti: ‘Mu umbileni poshi!’ Ovalumenhu ovo ova li va dulika kelombwelo laJehu, ngaashi u shi wete mefano olo. Ova umbila Isebel pedu, ndele ta fi. Onghalamwenyo yohambanghainhu ikolokoshi, Isebel, opo ya xulila opo.

1 Eehamba 16:29-33; 18:1-4; 21:1-16; 2 Eehamba 9:30-37.