Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 57

Kalunga ta hoolola David

Kalunga ta hoolola David

MBELA ou wete eshi sha ningwa po mefano olo? Omumati oo okwa xupifa okadjona oko e kwete mokanya kemwangha. Emwangha ole uya, ndele tali vakula po okadjona li ke ka lye po ngeno. Ndele omumati oo okwe li taataa, ndele ta xupifa okadjona oko mokanya kemwangha. Eshi emwangha la kala ofika, omumati okwe li kwata, ndele te li dipaa. Efiku limwe, omumati oo okwa li a amena natango odi imwe iha like po konghoshi. Omumati oo ka li tuu ependa! Mbela ou shi shii kutya edina laye olyelye?

Edina lomumati oo oDavid. Okwa li ha di muBetlehem. David omutekulululwa waObed. Obed okwa dalwa kuRut naBoas. Mbela oto va dimbuluka? Xe yaDavid oIsai. David okwa li ha lifa eedi daxe. David okwa li a dalwa pa pita omido 10, okudja eshi Saul a li a hoololwa kuJehova a ninge ohamba.

Konima yefimbo lonhumba, Jehova okwa li a lombwela Samuel a ti: ‘Kufa omaadi edimba liwa, ndele to i nao kuBetlehem, keumbo laIsai. Onda hoolola umwe womovanamati vaIsai a ninge ohamba.’ Eshi Samuel a fika meumbo laIsai, okwa mona omonamati waIsai woshiveli, Eliab, ndele te lipopile ta ti: ‘Oshili, omumati ou oye a hoololwa kuJehova.’ Ndele Jehova okwa lombwela Samuel a ti: ‘Ino tala komufika ile kondjelo yaye iwa. Ame haye nda hoolola a ninge ohamba.’

Onghee hano, Isai okwa ka ifana vali omonamati waye wedina Abinadab. Ndele Samuel okwa ti: ‘Ahowe, natango omumati oo haye a hoololwa kuJehova.’ Isai natango okwa ka tala omonamati wedina Samma. Natango Samuel okwa lombwela Isai a ti: ‘Ahowe, omumati ou naye haye a hoololwa kuJehova.’ Isai okwa kala ta eta ovamati vaye kuSamuel kooumwe, fiyo ovamati vaye vaheyali va pwa ko. Ndele Jehova ka li a hoolola po nande oumwe womwaavo vaheyali. Opo nee Samuel okwa pula Isai a ti: ‘Ovo aveke ovanamati voye ava?’

Isai okwa nyamukula a ti: ‘Ope na natango omumati ou munini kuvakwao, ashike oku li koufita ta lifa eedi.’ Eshi David a etwa, Samuel okwa mona kutya David okwa li omumati wondjelo iwa. Opo nee Jehova okwa lombwela Samuel a ti: ‘Omumati oye ngaho, mu vaeka omaadi momutwe.’ Samuel okwa li a ninga ngaashi Jehova e mu lombwela. Ndelenee opa li pa pita natango efimbo lile fimbo David ina ninga ohamba yaIsrael.

1 Samuel 17:34, 35; 16:1-13.