Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 60

Abigail naDavid

Abigail naDavid

MELA ou shi shii kutya omukainhu oo e na ondjelo iwa te uya okushakeneka David olyelye? Edina laye oAbigail. Abigail okwa li omukainhu omunaendunge nokwa li a kwafela David aha longe owii. Tete natu ka taleni manga kutya onghalamwenyo yaDavid oya li ya tya ngahelipi eshi a ninga onauki, opo nee hatu ka tala kutya Abigail okwa li a kwafela David aha ninge shike.

Konima eshi David a faduka po Saul, okwa ka kala a hondama mekololo. Ndele ovamwaxe noukwaneumbo wavo aushe owa li we uya okukala pamwe naye. Ovalumenhu aveshe kumwe ovo va li ve uya okukala naDavid ova li 400. David oye a li a ninga omuwiliki wavo. Opo nee David okwa ka ya kohamba yOvamoab, ndele ta ti kuyo: ‘Kwafele nge opo tate nameme va kale pwoove, fimbo handi tale kutya oshike tashi ka ningilwa nge.’ Lwanima, David novakwaita vaye ova ka kala va hondama keemhunda.

David ova ka shakena naAbigail konima yaasho. Omushamane waAbigail okwa li Nabal. Nabal okwa li omunaimuna nokwa li oshipuna. Okwa li e na eedi 3 000 noikombo 1 000. Ndelenee okwa li omukwanyanya. Omukulukadi waye, Abigail, okwa li omukainhu e na ondjelo iwa nokwa li yo ha longo ouyuki. Pomhito imwe okwa li nokuli a xupifa oukwaneumbo wambulavo. Natu ka taleni kutya osha li sha enda ngahelipi.

David novakwaita vaye ova kwafela Nabal, molwaashi ova li va kwafela ovapiya vaNabal mokupashukila eedi daye. Ndele efiku limwe, David okwa li a tuma ovakwaita vaye va ka pule ekwafo kuNabal. Ovakwaita vaDavid ova li va hanga Nabal novanailonga vaye tava kulula eedi. Efiku olo Nabal okwa li a ninga oshivilo meumbo laye nokwa li e na oikulya ihapu iwa. Onghee hano, ovakwaita vaDavid ove mu lombwela tava ti: ‘Otwa kala hatu ku longele ouwa. Inatu vaka po nande oimwe yomeedi doye, ndele otwa kala hatu di file oshisho. Alikana tu pa oikulya.’

Nabal okwe va nyamukula a ti: ‘Itandi yandje oikulya yange kovanhu ngaashi nye.’ Okwa li te litade nokwa li ta popile David momutyanai. Eshi ovalumenhu ovo va shuna, ova hokololela David ashishe eshi sha li sha ningwa po. David okwa li a handuka neenghono, nomolwaasho okwa lombwela ovakwaita vaye a ti: ‘Kufeni omaongamukonda eni!’ Opo nee ova ya va ka dipae ngeno Nabal novapiya vaye.

Omupiya umwe waNabal okwa ya kuAbigail, ndele te mu hokololele eendjovo dii odo Nabal a li ta sheke nado ovapiya vaDavid. Eshi Abigail a uda eshi sha ningwa po, okwa hovela okulongekida oikulya meendelelo. Okwa londeka oikulya keendongi, ndele ta i molweendo a ka shakeneke David. Eshi va shakena naDavid mondjila, Abigail okwa londoloka ko kondongi yaye nokwa twa eengolo, ndele ta ti: ‘Akutu, ino uda nai shi na sha nomushamane wange Nabal. Nabal elai, noha ningi oinima ya nyika oulai. Tambuleni oshali ei nde mu etela. Tu diminei po kwaasho sha ningwa po.’

David okwa nyamukula Abigail, a ti: ‘Ove omukainhu omunaendunge. Owa kelela nge ndiha dipae Nabal omolwouluva waye. Shuna keumbo nombili.’ Konima yefimbo eshi Nabal a fya, Abigail okwa ka hombolwa po kuDavid.

1 Samuel 22:1-4; 25:1-43.

Lihonga shihapu

NATU HOPAENENENI EITAVELO LAVO

Abigail okwa li a katuka pandunge

Oshike hatu lihongo shi na sha nonghalo idjuu yopahombo yaAbigail?