Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 55

Okamati kanini taka longele Kalunga

Okamati kanini taka longele Kalunga

MBELA okamati oko kanini kake na ondjelo iwa? Edina lako oSamuel. Omulumenhu oo u wete mefano e kwete Samuel momutwe omupristeri omukulunhu wOvaisrael. Edina laye oEli. Omushamane vali umwe oo u wete mefano oElkana, xe yaSamuel. Omukainhu oo e li mefano oHanna, ina yaSamuel. Ova eta Samuel kuEli.

Pefimbo olo, Samuel okwa li ashike e na omido nhe ile nhano lwaapo. Okwa li a fyaala ketwali laJehova pamwe naEli novapristeri vakwao. Mbela omolwashike Elkana naHanna va yandja okamati kanini ngaho ka ye ka ka longele Jehova ketwali laYe? Natu ka taleni kutya omolwashike.

Opa li pa pita ashike omido dinini eshi Hanna kwa li ha kala a nyika oluhodi neenghono. Okwa li a nyika oluhodi, molwaashi ka li e na okaana. Okwa li a hala neenghono okaana nande kamwe. Onghee hano, pomhito imwe fimbo Hanna a li e uya ketwali laJehova, okwa li a ilikana nokwa udanekela Jehova, a ti: ‘Jehova file nge onghenda. Akutu, pe nge okaana okamati. Ohandi ke ku pa okamati oko ke ku longele onghalamwenyo yako aishe.’

Jehova okwa li a nyamukula eilikano laHanna, molwaashi konima yeemwedi donhumba, Hanna okwa ka dala Samuel. Hanna okwa li e hole okamonamati kaye oko nokwa li a hovela oku ka honga kombinga yaJehova fimbo kanini. Okwa lombwela omushamane waye a ti: ‘Ohandi ka twala Samuel ketwali a ka kale ta longele Jehova, diva shimha a tovo.’

Ngaashi u shi wete mefano olo, Hanna naElkana ova twala Samuel ketwali laJehova ngaashi va udaneka. Samuel okwa li a hafa eshi e uya okukala ta longele Jehova petwali laye, molwaashi okwa li a hongwa nawa kombinga yaJehova kovadali vaye. Elkana naHanna ova li hava i omudo keshe va ka ilikane Jehova ketwali laye liyapuki, nova li hava talele po okamonamati kavo. Hanna okwa li ha twaalele Samuel oshikutu shokombada omudo keshe shomaoko maxupi.

Samuel okwa twikila okulongela Jehova ketwali liyapuki oule womido dihapu. Okwa li e holike kuJehova nokovanhu. Ndelenee omupristeri Eli okwa li e na ovanamati vavali ihava dulika. Omadina avo oHofni naPinehas. Ova li hava longo oilonga ii ihapu nova li hava ningifa ovanhu vamwe vaha dulike yo kuJehova. Eli okwa li e na okukufa mo ovanamati vaye moupristeri, ndele ka li e shi ninga.

Ndele nande ongaho, omunyasha Samuel ka li a efa oinima ii oyo ya li tai longwa metwali laJehova i mu efife po okulongela Jehova. Jehova okwa li a efa pa pite efimbo lile ina popya novanhu kombada yedu, molwaashi opa li ashike ovanhu vanini ovo ve mu hole. Natu ka taleni kutya oshike sha li sha ningwa po eshi Samuel a kula kanini.

Efiku limwe fimbo Samuel a li a kofela metwali, okwa uda ondaka tai mu ifana. Okwa nyamukula ta ti: ‘Aame ou.’ Opo nee okwa lotokela kuEli, ndele ta ti: ‘Onde uya, molwaashi owa ifana nge.’

Ndele Eli okwe mu nyamukula a ti: ‘Inandi ku ifana ame, shuna u ka nangale.’ Samuel okwa shuna metwali a ka nangale.

Fimbo a nangala okwa uda vali ondaka tai mu ifana tai ti: ‘Samuel!’ Samuel okwa penduka vali ndele tai kuEli. Okwa lombwela Eli ta ti: ‘Onde uya, molwaashi owa ifana nge.’ Ndele Eli okwe mu nyamukula vali a ti: ‘Inandi ku ifana ame, omumati wange. Inda natango u ka nangale.’ Samuel okwa shuna natango a ka nangale.

Ohaluka, okwa uda vali ondaka tai mu ifana oshikando oshititatu, tai ti: ‘Samuel!’ Natango, Samuel okwa lotokela kuEli ndele ta ti: ‘Aame ou, ondi na oushili kutya oove wa ifana nge oshikando eshi.’ Okudja opo, Eli okwa li a mona kutya Samuel oku na okukala ta ifanwa kuJehova. Onghee hano, okwa lombwela Samuel a ti: ‘Shuna u ka nangale natango, ndele ngeenge owa udu to ifanwa vali, ou na okutya: “Jehova popya, omupiya woye okwa pwilikina.”’

Samuel okwa li a ninga ngaashi a lombwelwa eshi Jehova a li te mu ifana natango. Opo nee, Jehova okwa li a lombwela Samuel kutya ota ka handukila Eli novanamati vaye. Lwanima, Hofni naPinehas ova ka fila moita, va dipawa kOvafilisti. Eshi Eli a kundana kutya ovanamati vaye ova fila molwoodi, okwa wa ko koshipundi ndele ta teka ofingo, ndele naye ta fi. Kungaho, eendjovo daJehova oda li da wanifwa.

Samuel okwa li a ninga omukulunhu nokwa ka ninga omutokolipangeli waxuuninwa waIsrael. Eshi a kulupa, ovanhu ove mu pula tava ti: ‘Hoolola ohamba i tu pangele.’ Samuel ka li a hala okuhoolola ohamba, molwaashi paulelalela Jehova oye a li ohamba yavo. Ndele nande ongaho, Jehova okwa li a lombwela Samuel a pwilikine koshiwana.

1 Samuel 1:1-28; 2:11-36; 4:16-18; 8:4-9.

Lihonga shihapu

Samuel okwa li ha longo osho sha yuka

Ongahelipi to dulu okuhopaenena Samuel mokukala ho longo osho sha yuka nonande vamwe otava ningi oinima ii?

Samuel “okwa kula pOmwene”

Oshike sha li she likalekelwa shi na sha nokuputuka kwaSamuel? Oshike she mu kwafela a kulike eitavelo laye eshi a li ketwalihangano?