Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 42

Ondongi tai popi

Ondongi tai popi

MBELA owa uda nale ondongi tai popi? Otashi dulika u tye, ‘ahowe, oinamwenyo ihai popi.’ Ndele Ombibeli otai tu hokololele kombinga yondongi imwe oyo ya li ya popya. Natu ka tale kutya osha li sha enda ngahelipi.

Pefimbo olo, Ovaisrael ova li pokuya muKanaan. Ndele ohamba yOvamoab, Balak, oya li ye va tila neenghono. Onghee hano, Balak okwa ifana omumonikokule wedina Bileam e uye a finge Ovaisrael. Molwaashi Balak okwa li a udanekela Bileam oimaliwa ihapu, Bileam ka li a ongaonga okuuya kuBalak. Okwe uya a londa kondongi yaye.

Jehova ka li a hala Bileam a finge oshiwana shaYe. Onghee hano, okwa li a tuma omweengeli e na eongamukonda lile a ye a ka kelele Bileam. Ondongi yaBileam oya mona omweengeli a fikama mondjila, ndele Bileam ka li e mu wete. Eshi ondongi ya mona omweengeli oya li tai kendabala oku mu henuka, ndele oya ka nyengwa okupita po. Hauxuuninwa oya nangala ashike mondjila. Bileam okwa li a handuka neenghono nokwa hovela okudenga ondongi yaye noshiti.

Opo nee Jehova okwa ningifa ondongi yaBileam i popye. Ondongi oya pula Bileam ya ti: ‘Onde ku ninga shike eshi to denge nge?’

Bileam okwa nyamukula a ti: ‘Oto nyikifa nge oulai. Ngeno onda li nokuli ndi na eongamukonda, ngeno ohandi ku dipaa!’

Ondongi oye mu pula vali ya ti: ‘Mbela ope na ngoo efiku limwe nde ku ningile ngaha?’

Bileam okwa nyamukula a ti: ‘Ahowe.’

Opo nee Jehova okwa pashula omesho a Bileam a dule okumona omweengeli oo a li a fikama mondjila e kwete eongamukonda meke laye. Omweengeli okwe mu pula a ti: ‘Omolwashike to denge ondongi yoye? Onde uya ndi ku kelele opo uha ka finge Ovaisrael. Ngeno ondongi yoye kaya li ya kanghama, ngeno onde ku dipaa. Ashike ondongi yoye ngeno inandi i kuma.’

Bileam okwa nyamukula a ti: ‘Onda nyona. Kanda li ndi shi shii ngeenge owa fikama mondjila.’ Omweengeli okwa efa Bileam a twikile nolweendo laye, ndele tai kuBalak. Bileam okwa li ta kendabala natango okufinga Ovaisrael, ndele ponhele yaasho, Jehova okwa li a ningifa Bileam a nangeke noupuna Ovaisrael lwoikando itatu.

Numeri 21:21-35; 22:1-40; 23:1-30; 24:1-25.