Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 53

Jefta ta udanekele Jehova eudaneko

Jefta ta udanekele Jehova eudaneko

MBELA owa ningile eudaneko fiku limwe ndele to ka mona shidjuu oku li wanifa po? Omulumenhu oo u wete mefano olo okwa li a ninga eudaneko lonhumba nokwa nyemata molwaashi okwa li e wete shidjuu oku li wanifa po. Omulumenhu oo omutokolipangeli ependa womuIsrael. Edina laye oJefta.

Jefta okwa li ko pefimbo eshi Ovaisrael va li natango ve liteeka Jehova. Ova li tava longo natango owii. Onghee hano, Jehova okwa li e va efa va kale tava hepekwa kOvaammon. Onghalo oyo oya li ya ningifa Ovaisrael va indile ekwafo kuJehova, tava ti: ‘Otwa nyona kwoove, ndele tu xupifa.’

Ovaisrael ova li ve livela ombedi omolwoilonga ii oyo va kala tava longo. Ova li va ulika kutya ove livela ombedi eshi va hovela natango okulongela Jehova. Onghee hano, Jehova okwa li a tokola oku va kwafela natango.

Oshiwana osha li sha hoolola Jefta a ninge omuwiliki washo eshi tava ka lwifa Ovaammon. Ndele Jefta okwa li a halelela Jehova e mu kwafele a findane molwoodi olo. Nomolwaasho okwa li a udanekela Jehova a ti: ‘Ngeenge owa kwafele nge ndi finde Ovaammon, ohandi ke ku pa omunhu oo te uya okushakeneka nge tete eshi handi alukile keumbo okudja kolwoodi.’

Jehova okwa li a pwilikina keudaneko laJefta nokwa li e mu pa efindano. Mbela ou shi shii kutya olyelye a li e uya okushakeneka tete Jefta eshi a alukila keumbo? Omonakadona waye, ewifa laye. Eshi Jefta a mona omonakadona, okwa lila ta ti: ‘Akutu omona wange! Omolwashike to nyikifa nge oluhodi? Onda udanekela Jehova eudaneko, noitandi dulu okukala inandi li wanifa po.’

Omonakadona waJefta okwa li a nyemata pehovelo eshi a uda kombinga yeudaneko olo xe a li a ninga, molwaashi oku na okufiya po xe nosho yo ookahewa kaye. Okwa li ta ka longela Jehova ketwali lomuSilo okukalamwenyo kwaye akushe. Onghee hano, okwa lombwela xe a ti: ‘Molwaashi owa udanekela Jehova eudaneko, ou na oku li wanifa po.’

Omonakadona waJefta okwa ka ya kuSilo. Okwa ka kala ta longele Jehova metwali okukalamwenyo kwaye akushe. Ovakainhu vomuIsrael ova li hava i ve ke mu talele po nokuhafela pamwe omafiku anhe omudo keshe. Ovanhu ova li ve hole okamonakadona kaJefta, molwaashi oka li haka longele Jehova noudiinini.

Ovatokolipangeli 10:6-18; 11:1-40.