Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 35

Jehova ta yandje oipango

Jehova ta yandje oipango

KONIMA yeemwedi mbali lwaapo okudja eshi Ovaisrael va fiya po Egipti, ova li ve uya fiyo opomhunda yaSinai, oyo ya li hai ifanwa yo omhunda yaHoreb. Pomhunda oyo opo naanaa Jehova a li a popya naMoses okudja moshixwa shinya sha li sha xwama omundilo. Ovaisrael ova li va onga onhanda oule wokafimbo pomhunda oyo.

Efiku limwe, Jehova okwa li a lombwela Moses a londe komhunda oko fimbo Ovaisrael va teelela pefina lomhunda. Opo nee Jehova okwa li a lombwela Moses kutya okwa hala Ovaisrael va kale tava dulika kuye nokwa hala va ninge oshiwana shaYe she likalekelwa. Eshi Moses a londoloka komhunda, okwa li a lombwela Ovaisrael osho Jehova e mu lombwela. Ovaisrael ova li va dimina kutya otava ka kala tava dulika kuJehova nonokutya ova hala okukala oshiwana shaye.

Opo nee, Jehova okwa ninga po oshinima shikumwifi. Okwa ningifa oxulo yomhunda i dje omwifi nomipwalakato dinene. Okwa lombwela yo Ovaisrael a ti: ‘Aame Jehova Kalunga keni ou e mu mangulula muEgipti.’ Opo nee okwe va pa oshipango tashi ti: ‘Inamu longela ookalunga vamwe; aame ashike mu na okulongela.’

Jehova okwa li yo a pa Ovaisrael oipango imwe natango i li omuwoi. Ndele ovanhu ova li va tila eshi va uda Jehova ta popi navo. Opo nee ova lombwela Moses va ti: ‘Oove u popya nafye, molwaashi otwa tila kutya ohatu fi ngeenge Kalunga oye ta popi nafye.’

Lwanima, Jehova okwa li a lombwela vali Moses a ti: ‘Ila kwaame komhunda. Ohandi ke ku pa oipelende ivali yomamanya oko handi ka shanga oipango oyo nda hala oshiwana shange shi diinine.’ Moses okwa londa komhunda ngaashi Kalunga e mu lombwela, ndele ta kala oko omafiku 40.

Kalunga okwa li a pa oshiwana shaye eemhango dihapu, naMoses okwa li e di shanga. Kalunga okwa li yo a pa Moses oipelende ivali yomamanya oko kwa li kwa shangwa oipango 10. Kalunga oye mwene a shanga oipango 10 oyo a li a lombwela oshiwana shaye.

Oipango oyo Omulongo oya li ya fimanenena. Ashike oipango ikwao oyo Kalunga a li a pa Ovaisrael nayo oya li ya fimana. Shimwe shomoipango oyo Kalunga a yandja otashi ti: ‘Hola Jehova Kalunga koye nomutima woye aushe, nomadiladilo oye aeshe, nomwenyo woye aushe neenghono doye adishe.’ Oshipango shimwe vali otashi ti: ‘Hola mukweni ngaashi u lihole mwene.’ Omona waKalunga, Jesus Kristus, okwa ti kutya oipango oyo ivali oyo oipango inenenene moipango aishe oyo Kalunga a li a pa Ovaisrael. Ohatu ke lihonga shihapu kombinga yOmona waKalunga nosho yo omahongo a ye momahokololo oo e li komesho.

Exodus 19:1-25; 20:1-21; 24:12-18; 31:18; Deuteronomion 6:4-6; Leviticus 19:18; Mateus 22:36-40.