Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 34

Oikulya ipe

Oikulya ipe

MBELA ou shi shii kutya oshike osho ovanhu tava toola pedu? Otashi monika shitoka tootoo sha fa eandu ile eemhawe. Oinima oyo kai fi eandu ile eemhawe, ndele oikulya. Oikulya oyo oi li molupe loupatupatu vanini.

Konima eshi Ovaisrael va kala mombuwa oule womwedi lwaapo, ova li va hovela okungongota shi na sha noikulya, molwaashi mombuwa kamwa li hamu mene oikulya ihapu. Ovaisrael ova li tava ngongota tava ti: ‘Ngeno Jehova okwe tu dipaele ashike muEgipti, molwaashi muEgipti okwa li hatu li ngaashi twa hala.’

Onghee hano, Jehova okwe va lombwela a ti: ‘Ohandi ke mu lokifila oikulya okudja keulu.’ Jehova osho naanaa a li a ninga mefiku la landula ko. Eshi Ovaisrael va penduka ongula, ova mona oinima itoka tootoo ya wila pedu. Ova li tava pulafana tava ti: ‘Oshike osho?’

Moses okwe va lombwela a ti: ‘Oikulya oyo Jehova e mu pa mu lye.’ Ovaisrael ove i luka OMANNA. Omanna oku na omulyo wa fa woukuki va telekwa moufila wa lumbakanifwa nomaadi eenyiki.

Moses okwa lombwela ovanhu a ti: ‘Ongeleni oikulya ya wana paemhumbwe deni.’ Ovaisrael ova li hava ongele omanna ongula keshe. Ngeenge omutenya owa tu, omanna oo inaa toolwa po ohaa hengumuka po komutenya.

Moses okwa lombwela yo ovanhu a ti: ‘Inamu lixupifila po nande omanna omefiku tali landula ko.’ Ashike ovanhu vamwe kava li va pwilikina. Mbela ou shi shii kutya oshike sha ka ningwa po? Omanna oo va xupifa po eshi va lya, mongula eshi kwasha okwa pita a tukwa komainyo nokwa li taa nyika nai.

Ndele Jehova okwa li a lombwela ovanhu va kale tava ongele mefiku etihamano omanna a wana omafiku avali, molwaashi ka li ta ka lokifa omanna mefiku etiheyali. Omanna oo kwa li haa xupu po mefiku etihamano, a nuninwa efiku etiheyali, kaa li haa tukwa komainyo ile a pite taa nyika. Osho osha li natango oshikumwifilonga.

Jehova okwa kala ta palula Ovaisrael nomanna omido adishe odo va kala mombuwa.

Exodus 16:1-36; Numeri 11:7-9; Josua 5:10-12.