Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 25

Oukwaneumbo waJakob tau tembukile kuEgipti

Oukwaneumbo waJakob tau tembukile kuEgipti

JOSEF ka li ta dulu vali okupangela omaliudo aye. Onghee hano, okwa lombwela ovapiya vaye va dje mo monduda. Eshi ovapiya va dja mo, okwa li a fyaala mo ashike novamwaxe. Opo nee, Josef okwa hovela okulila. Ovamwaxe vaJosef kava li tuu va kumwa eshi ve mu mona ta kwena! Kava li ve shi shii kutya omolwashike ta kwena. Xuuninwa, Josef okwa lombwela ovamwaxe a ti: ‘Aame Josef. Tate oku na ngoo natango omwenyo shili?’

Ovamwaxe ova li va kumwa neenghono nokava li tava dulu okutya sha. Ova li va tila. Ndele Josef okwe va lombwela a ti: ‘Eheneni oku kwaame.’ Eshi va ehena kuye, okwe va lombwela a ti: ‘Aame Josef, omumwaxo ou mwa landifile po kuEgipti.’

Josef okwa twikila okupopya navo neendjovo donghenda, a ti: ‘Inamu lipa oushima eshi mwa landifa nge po, molwaashi Kalunga oye lela a tuma nge kuEgipti opo ndi dule okuxupifa eemwenyo dovanhu. Farao okwa ninga nge omupangeli woshilongo ashishe. Onghee hano, indeni diva keumbo ndele tamu hepaululile tate oinima aishe ei nde mu lombwela. Mu lombweleni yo e uye tu kale oku.’

Opo nee, Josef okwa papatela ovamwaxe ndele te va xupita aveshe. Eshi Farao a uda kutya ovamwaxe vaJosef ove uya po, okwa lombwela Josef a ti: ‘Va pa omatemba va ye va ka tale ko xo nomaukwaneumbo avo opo ve uye va kale oku. Ohandi ke va pa edu olo liwa elela muEgipti alishe.’

Ova ninga naanaa ngaashi Farao e va lombwela. Ou wete mefano omo eshi Josef va shakena naxe noukwaneumbo waye aushe eshi ve uya muEgipti?

Oukwaneumbo waJakob owa li wa ninga wa kula neenghono. Eshi ve uya muEgipti, ova li 70 aveshe kumwe, sha hala kutya, Jakob novana vaye nosho yo ovatekulu vaye. Ndele ova li yo ve uya pamwe novakulukadi vahapu notashi dulika va li ve uya novapiya vahapu. Oukwaneumbo aushe owa ka kala muEgipti. Molwaashi Kalunga okwa li a lundulula edina laJakob li ninge Israel, oukwaneumbo waye aushe owa li hau ifanwa Ovaisrael. Ovaisrael ova ka ninga oshiwana she likalekelwa kuKalunga ngaashi hatu ke shi mona komesho.

Genesis 45:1-28; 46:1-27.