Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 28

Nghee Moses a xupifwa fimbo a li okahanana

Nghee Moses a xupifwa fimbo a li okahanana

TALA okahanana oko ta ka lili ke li mefano ke kwete omunwe womukainhu! Okahanana oko oMoses. Mbela ou shi shii kutya omukainhu oo muwa olyelye? Omukainhu oo omonakadona waFarao, ohamba yaEgipti.

Moses okwa li a holekwa kuina fiyo osheshi a wanifa eemwedi nhatu. Okwa kala e mu holeka, molwaashi ka li a hala a dipawe kOvaegipti. Ndele okwa li e shi shii kutya oshi na oupu Moses a monike, onghee okwa ninga po sha opo e mu xupife.

Ina okwa li a tunga okakefa keembungu ile tu tye okambaba, ndele te ka fili neka opo kaha ye omeva. Opo nee okwa tula Moses mokambaba oko ndele te ka pake mokati komwiidi mule komunghulo womulonga waNil. Omumwainakadona waMoses wedina Miriam okwa li a lombwelwa kuina a kale popepi ta tale kutya oshike tashi ningwa po shi na sha naMoses.

Fimbo Miriam ta tale, omonakadona waFarao okwe uya okulikosha momulonga waNil. Ohaluka, okwa mona okambaba ke li momwiidi mule. Opo nee omonakadona waFarao okwa tuma umwe womovapiya vaye ovakainhu, a ti: ‘Inda u ka talele nge okambaba kenya.’ Eshi okambaba ka etwa, omonakadona waFarao okwa tuula ko nokwa hanga mo okahanana kawa. Okahanana oko oka hovela okukwena nomonakadona wohamba okwa li e ka uditile olukeno. Ka li nokuli a hala ka dipawe.

Opo nee Miriam okwe uya puvo ngaashi tashi monika mefano olo. Miriam okwa pula omonakadona waFarao ta ti: ‘Nandi ke ku ifanene omukainhu Omuisrael e ku tekulile ko kokahanana aka?’

Omonakadona wohamba okwa dimina a ti: ‘Heeno, inda u ka kongele nge omunhu oo ta dulu oku ka tekulila nge.’

Miriam okwa lotoka divadiva ndele ta ka lombwela ina. Eshi ina yaMoses e uya, omonakadona waFarao okwe mu lombwela a ti: ‘Tambula okaana aka u ka tekulile nge. Ohandi kala handi ku futu oimaliwa.’

Kungaho, ina yaMoses okwa kala ashike ta tekula okaana kaye mwene. Eshi Moses a kula, ina okwe mu twala komonakadona waFarao. Omonakadona waFarao okwa li a tambula ko Moses nokwa li e mu tala ko onga omona waye. Osho sha li sha enda ngaho opo Moses a kulile meumbo laFarao.

Exodus 2:1-10.