Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 31

Moses naAron tava i kuFarao

Moses naAron tava i kuFarao

ESHI Moses a alukila kuEgipti, okwa hokololela omumwaina Aron kombinga yoikumwifilonga aishe oyo Kalunga a li e mu ulikila. Opo nee Moses naAron ova ka ulikila Ovaisrael oikumwifilonga oyo, nOvaisrael ova li va itavela kutya Moses naAron ova tumwa shili kuKalunga.

Efiku limwe Moses naAron ova li va ya va ka popye naFarao keumbo laye. Ove mu lombwela tava ti: ‘Jehova Kalunga kaIsrael okwa ti: “Efa oshiwana shange shi ka ilikane nge oule womafiku atatu mombuwa.”’ Farao okwa nyamukula a ti: ‘Ame inandi itavela muJehova, nomolwaasho itandi ka efa Ovaisrael va ye ve ke mu ilikane.’

Farao okwa li a handuka neenghono eshi Ovaisrael va li va hala okufiya po oilonga yaye va ka ilikane Jehova. Onghee hano, okwa weda ko koilonga yavo opo va kale tava longo noudjuu. Ovaisrael ova li tava pe Moses oushima, molwaashi ova li tava hepekwa nai shi dulife nale. Moses okwa li a nyika oluhodi omolwokuvelwa eembedi. Ndele Jehova okwe mu lombwela aha kale a handuka kwaasho. Jehova okwa ti: ‘Ohandi ka fininika Farao a efe oshiwana shange shi ye.’

Pomhito imwe vali, Moses naAron ova li va ya natango kuFarao. Pomhito oyo ova longa oshikumwifilonga moipafi yaFarao. Aron okwa li a ekela onhaili yaye pedu ndele tai shituka eyoka la kula. Ovanongo vaFarao navo ova li va ekela eenhaili davo pedu ndele nado tadi shituka omayoka. Ashike eyoka laAron ola xwaka po omayoka ovanongo vaFarao. Ndele nande ongaho, Farao okwa li a tokola kutya ita ka efa Ovaisrael.

Jehova okwa li a tokola okuhonga Farao oshilihongomwa. Mbela ou shi shii kutya Jehova okwa ninga po shike? Okwa pa Ovaegipti omahandukilo 10.

Konima yomahandukilo mahapu, Farao okwa li ha ifana Moses, ndele ta ti kuye: ‘Xulifa po ehandukilo eli, opo nee ohandi ka efa Ovaisrael va ye.’ Ndele shimha ashike ehandukilo olo la xulifwa po, Farao okwa li ha ninguluka. Ka li ha efa Ovaisrael va ye shili. Hauxuuninwa, Farao okwa ka efa Ovaisrael va ye konima yehandukilo eti-10.

Mbela omahandukilo aeshe oo 10 ou a shii? Ohatu ke lihonga kombinga yao mehokololo tali landula.

Exodus 4:27-31; 5:1-23; 6:1-13, 26-30; 7:1-13.