Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 33

Ovaisrael tava tauluka Efuta Litilyana

Ovaisrael tava tauluka Efuta Litilyana

TALA koshiningwanima osho tashi ulikwa mefano olo! Omulumenhu oo a yelula onhaili yaye ta ulike kombada yEfuta Litilyana oMoses. Ovo ve li pamwe naye komutunda Ovaisrael. Ofimbo Farao nomatanga aye ovakwaita tava fi omeva, Ovaisrael ova pitifwa mefuta olo poukukutu. Natu ka tale kutya osho osha enda ngahelipi.

Ngaashi twe lihonga nale, konima yehandukilo etimulongo Farao okwa li a lombwela Ovaisrael va fiye po Egipti. Ovalumenhu Ovaisrael ovo va dja muEgipti ova li 600 000 lwaapo nova li yo va ya pamwe novakainhu vahapu nounona. Opa li yo Ovaegipti vamwe ovo va li va itavela muJehova nova li yo va ya pamwe nOvaisrael. Ovanhu aveshe ovo ova li va ya pamwe needi davo, oikombo yavo neengobe davo.

Fimbo Ovaisrael inava dja mo muEgipti, ova pula Ovaegipti ve va pe oikutu nosho yo oinima oyo ya longwa moshingoli nomoshisilveri. Molwaashi Ovaegipti ova li va tila neenghono omolwehandukilo etimulongo, ova pa Ovaisrael keshe osho va li tava pula.

Konima yomafiku manini eshi va dja muEgipti, ova li ve uya pEfuta Litilyana. Ova li va tula oule wokafimbo pefuta olo opo va fude po. Ndele fimbo tava fuda po, Farao novakwaita vaye ova li tave lipe oushima kutya omolwashike va efa Ovaisrael va ye, tava ti: ‘Otwa efa ovapika vetu va ye.’

Farao okwa li a ninguluka natango. Onghee hano, okwa kufa etemba laye loita nokwa unganeka etangakwaita laye opo va ka taatae Ovaisrael. Ovaegipti ova li va kufa omatemba oita 600 e likalekelwa nosho yo omatemba makwao aeshe omuEgipti.

Ovaisrael ova li va tila neenghono eshi va mona kutya Farao novakwaita vaye otave va shikula. Kava li tava dulu okuya onhapo, molwaashi kombinga imwe okwa li ku na Efuta Litilyana, ofimbo kombinga ikwao kwa li Ovaegipti. Ohaluka, Jehova okwa tula oluudi loshilemo pokati kavo nOvaegipti. Oshilemo osho osha li tashi imbi Ovaegipti vaha ponokele Ovaisrael, molwaashi kava li tava dulu oku va mona.

Opo nee Jehova okwa lombwela Moses a yelule onhaili yaye kombada yEfuta Litilyana. Eshi Moses a yelula onhaili yaye, Jehova okwa pepifa omhepo yokoushilo i na eenghono. Omeva efuta okwa tukauka ndele taa kala a fikama keembinga adishe, kolulyo nokolumosho.

Kungaho, Ovaisrael ova dula okutauluka efuta olo tava ende poukukutu. Osha li sha kwata oule weevili dihapu opo Ovaisrael omamiliyona, mwa kwatelwa aveshe ovo va li pamwe navo, va dule okutauluka efuta olo pamwe noinamwenyo yavo aishe. Xuuninwa, Kalunga okwa kufa po oshilemo osho sha li pokati kavo nOvaegipti, nOvaegipti ova li tava dulu vali oku va mona. Pefimbo opo ovapika vavo ova hangwa va tauluka nale efuta. Onghee hano, Ovaegipti ova mbolokotela mefuta va ka alule ngeno ovapika vavo Ovaisrael.

Fimbo Ovaegipti tava ende mefuta, Kalunga okwa li ta xukula ko omaulu omatemba avo. Ovaegipti ova li va kwatwa koumbada nova hovela okulila tava ingida tava ti: ‘Jehova ota kondjele Ovaisrael. Natu fadukeni po!’ Ndelenee kapa li vali omhito yokufaduka po.

Ofimbo Ovaegipti va li tava kendabala okufaduka po, Jehova okwa lombwela Moses a yelule natango onhaili yaye kombada yEfuta Litilyana ngaashi sha ulikwa mefano. Opo nee eshi Moses a yelula vali onhaili yaye, omeva okwa hovela okuya kumwe nokwa pwipwikila po Ovaegipti nomatemba avo. Etangakwaita laEgipti alishe ola li la shikulila mo Ovaisrael mefuta, ndele ovakwaita valo aveshe ova li va fila mo omeva.

Oshiwana shaKalunga osha li sha hafa neenghono eshi sha xupa. Ovalumenhu ova li va imbila Jehova Kalunga eimbilo lolupandu, tava ti: ‘Jehova okwa findana efindano linene. Okwa undwila eenghambe novalondi vado mefuta.’ Ovakainhu aveshe navo ova li tava hambelele Kalunga tava denge oungoma ve kwetelwe komesho kuMirjam, omumwainakadona waMoses. Ova li tava dana nehafo nokwiimba pamwe novalumenhu tava ti: ‘Jehova okwa findana efindano linene. Okwa undwila eenghambe novalondi vado mefuta.’

Exodus etukulwa eti-12 fiyo eti-15.