Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 24

Josef ta yeleke ovamwaxe

Josef ta yeleke ovamwaxe

JOSEF okwa li a hala okutala ngeenge ovamwaxe 10 ova lundulula ngoo oikala yavo ile ove na onyanya natango. Onghee hano, okwe va ula a ti: ‘Nye eendadi. Omwe uya okutala apa oshilongo shetu sha heva.’

Ove mu nyamukula tava ti: ‘Ahowe, katu fi eendadi. Fye ovanhu vawa. Atushe otwa dalwa kuxe umwe. Otwa li 12, ndele umwe ke ko vali. Onghelo yetu oya fyaala natate keumbo.’

Josef okwa li te liningifa a fa ina dimina osho tava popi. Okwa tulifa omumwaxe wedina Simeon modolongo, ndele ta efa vakwao va pewe oikulya nova shune keumbo. Ashike okwe va lombwela a ti: ‘Eshi tamu ka aluka, omu na okweetelela onghelo yeni.’

Eshi ovamwaxe va fika keumbo kuKanaan, ova hepaululila xe Jakob ashishe osho sha li sha ningwa po. Eshi Jakob a uda ehokololo olo, okwa li a nyemata neenghono. Okwa lila a ti: ‘Josef ke po vali, ndele naSimeon vali. Itandi ke mu pitika nandenande mu ye nonghelo yange Benjamin.’ Ndele eshi oikulya yavo ya li pokupwa po, Jakob okwa efa Benjamin a ye novamwaxe kuEgipti opo va dule oku ka mona oikulya.

Eshi Josef e va mona tave uya ve li nondenge yaye Benjamin, okwa li a hafa neenghono. Ndelenee ovamwaxe vaJosef kava li va shiiva natango kutya omulumenhu oo a fimana oJosef. Josef okwa li a ninga po vali oshinima shimwe opo a yeleke ovamwaxe 10.

Okwa lombwela ovapiya vaye va tule oikulya momakutu ovamwaxe. Ndele okwa li a tulifa meholeko eholo laye loshisilveri mekutu laBenjamin. Eshi ovamwaxe vaJosef va ya kokule kanini, Josef okwa tuma ovapiya vaye ve va shikule. Ovapiya vaye eshi ve va hanga, ova pula tava ti: ‘Omolwashike mwa vakela po eholo lomwene wetu loshisilveri?’

Ovamwaxe vaJosef aveshe ova nyamukula tava ti: ‘Inatu vaka po eholo laye. Tu hadeni, ndele ngeenge omwe li mono, ou e li kwete na dipawe.’

Ovapiya vaJosef ova hada momakutu aeshe, ndele ova hanga eholo olo mekutu laBenjamin ngaashi sha ulikwa mefano olo. Ovapiya ova ti: ‘Nye indeni amushe, ashike Benjamin ohatu i naye.’ Mbela ovamwaxe 10 ova li va ninga po shike?

Aveshe ova li va shuna naBenjamin keumbo laJosef. Josef okwa lombwela ovamwaxe 10 a ti: ‘Nye otamu dulu okuya keumbo, ndele Benjamin ota fyaala po a ninge omupika wange.’

Opo nee Juda okwa lombwela Josef a ti: ‘Tate ota ka fya ngeenge onda shuna ndihe na omumati ou, molwaashi oku mu hole neenghono. Onghee hano, nandi ninge omupika woye ponhele yomumati oo, ove to mu efa a shune keumbo.’

Paife Josef okwa mona kutya mboli ovamwaxe kave na vali oikala ii. Kava li vali ovakwanyanya. Natu ka taleni kutya Josef ota ka ninga po shike mehokololo tali landula.

Genesis 42:9-38; 43:1-34; 44:1-34.