Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 21

Josef a tondwa kovamwaxe

Josef a tondwa kovamwaxe

TALA okamati oko taka monika ka nyemata nokehe na eteelelo lasha. Edina lako oJosef. Ovamwaxe vaJosef otave mu landifa po kovalumenhu ovo u wete mefano olo. Ovalumenhu ovo ove li mondjila va finda kuEgipti. Josef ota ka ningwa omupika. Mbela omolwashike ovamwaxe tava ningi oshinima shii sha tya ngaho? Omolwaashi ova li va twila Josef ondubo.

Xe Jakob okwa li e hole Josef neenghono. Okwa li a ulika kutya oku hole Josef eshi e mu hondjifila oshikutu shile shiwa. Eshi ovakulu vaJosef 10 va mona kutya xe yavo Jakob oku hole unene Josef, ova hovela okutwila Josef ondubo noku mu tonda. Ashike opa li pe na natango etomheno limwe kutya omolwashike va li ve mu yele.

Josef okwa twile eendjodi mbali. Oikando aishe ivali, Josef okwa twa ondjodi ovamwaxe ve uya oku mu linyongamena. Eshi Josef a hokololela ovamwaxe eendjodi odo, ova ka kala ve mu tonde neenghono shi dulife nale.

Efiku limwe fimbo ovamwaxe vaJosef va li koufita weedi dambulavo, Jakob okwa li a tuma Josef a ye kuvo a ka tale kutya ove li po ngahelipi. Eshi ovamwaxe vaJosef ve mu mona te uya, vamwe ova lombwelafana tava ti: ‘Natu mu dipaeni!’ Ndele Ruben, oo a li oshiveli shavo, okwa ti: ‘Ahowe, inatu mu dipaa!’ Ponhele yaasho, ova kwata Josef ndele tave mu ekele melambo mukukutu. Opo nee ova kala omutumba tava kundafana kutya nave mu ninge shike.

Fimbo va li tava kundafana, okwa dja ovalumenhu Ovaismael. Juda okwa lombwela ovamwaxe ta ti: ‘Natu mu landifei po kOvaismael.’ Ova tokola oku mu landifa po. Ove mu landifa po kombilixa, oisilveri 20. Ovamwaxe vaJosef kava li tuu ovakwanyanya!

Ovamwaxe vaJosef ova ka lombwela xe shike eshi va shuna keumbo? Tete fimbo inava shuna keumbo, ova dipaa oshikombo ndele tava dedaula oshikutu shaJosef mohonde yoshikombo. Eshi va fika keumbo, ova ulikila xe oshikutu shaJosef, ndele tava ti: ‘Otwa toola oshikutu eshi. Tala ngeenge kashi fi shaJosef.’

Jakob okwa mona kutya oshikutu oshaJosef. Okwa hovela okulila, ta ti: ‘Josef oku na okukala a lika po koshifitukuti.’ Ovamwaxe vaJosef osho naanaa va li va hala xe Jakob a diladile ngaho. Jakob okwa li a nyika oluhodi neenghono. Okwa kala ta lili oule womafiku mahapu. Ndelenee Josef ka li a fya shili. Natu ka taleni kutya Josef okwa ka ningilwa shike kuEgipti oko a twalwa.

Genesis 37:1-35.