Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 22

Josef ta tulwa modolongo

Josef ta tulwa modolongo

JOSEF okwa li ashike e na omido 17 eshi a twalwa kuEgipti. Ovaismael ova li ve mu landifa po komulumenhu wedina Potifar. Potifar okwa li ha longele Farao, ohamba yaEgipti.

Josef okwa li ha longele Potifar noudiinini. Onghee hano, eshi Josef a kula, Potifar okwe mu ninga elenga lokupashukila eumbo laye alishe. Ndele osha enda ngahelipi opo Josef a tulwe modolongo? Okwa tulifwa mo komukulukadi waPotifar.

Josef okwa li omulumenhu e na ondjelo iwa, nomukulukadi waPotifar okwa li a hala okuya naye momilele. Ndelenee Josef okwa li e shi shii kutya osha puka okuninga ngaho nokwa li a tokola kutya ite shi ningi. Omukulukadi waPotifar okwa li a handuka neenghono. Eshi omushamane waye a dimbuka koilonga, okwe mu lombwela oipupulu, a ti: ‘Josef mboli ke na omikalo; okwa li ta kendabala okukwata nge keenghono a nangale naame!’ Potifar okwa li a itavela osho a lombwelwa komukulukadi waye. Okwa li a handukila Josef neenghono. Nomolwaasho, okwa tulifa Josef modolongo.

Konima yefimbo lixupi, omukulunhu wodolongo okwa li a didilika kutya Josef omulumenhu muwa. Onghee hano, okwa ninga Josef omukulunhu wovanadolongo vakwao. Lwanima, Farao okwa li a handukila omupindili waye nomuteleki waye womingome ndele te va tulifa modolongo. Efiku limwe, ovalumenhu ovo vavali ova li va twa eendjodi dikumwifi, ndele kava li ve shi shii kutya oda hala okutya ngahelipi. Ongula eshi kwa sha, Josef okwa ti kuvo: ‘Hepaululilei nge eendjodi deni edi mwa twa.’ Ovalumenhu ovo ova hokololela Josef eendjodi davo. Opo nee, Josef okwa kwafelwa kuKalunga e va fatululile eendjodi davo.

Josef okwa fatululila omupindili waFarao ondjodi yaye, a ti: ‘Oto ka mangululwa mo modolongo konima yomafiku atatu noto ka shunifwa moshilonga shoye shokupindila Farao.’ Opo nee Josef okwa lombwela omupindili a ti: ‘Ngeenge owa di mo modolongo, hepaululila Farao kombinga yange opo ndi kufwe mo modolongo.’ Josef okwa fatululila omuteleki womingome ondjodi yaye, a ti: ‘Farao ota ka tetifa ko omutwe woye konima ashike yomafiku atatu.’

Eendjodi dovalumenhu ovo oda li da wanifwa ngaashi naanaa Josef a fatulula. Konima yomafiku atatu, Farao okwa li a tetifa ko omutwe womuteleki waye womingome. Omupindili waye okwa mangululwa mo modolongo ndele ta shunifwa moshilonga shaye shokuyakula ohamba. Ndelenee omupindili ka li a dimbulukwa Josef. Ina lombwela sha Farao kombinga yaJosef, onghee hano, Josef ka li a kufwa mo modolongo.

Genesis 39:1-23; 40:1-23.