Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 16

Isak ta hombola omukainhu muwa

Isak ta hombola omukainhu muwa

MBELA ou shi shii kutya omukainhu oo e li mefano olo olyelye? Edina laye oRebekka. Omulumenhu oo te ke mu shakeneka oIsak. Rebekka ota ka ninga omukulukadi waIsak. Mbela osho osha enda ngahelipi?

Abraham, xe yaIsak, okwa li a hala omonamati waye Isak a hombole omukainhu muwa. Ka li a hala Isak a hombole ovakainhu Ovakanaan, molwaashi Ovakanaan ova li hava longele oikalunga. Onghee hano, efiku limwe Abraham okwa ifana omupiya waye umwe ndele ta ti kuye: ‘Onda hala u ye kuHaran oko ku na ovapambele vange, u ka kongele omona wange Isak omukulukadi.’

Divadiva, omupiya waAbraham okwa kufa eengamelo omulongo nokuya molweendo olo lile. Eshi a fika popepi noshilando omo mwa li hamu kala ovapambele vaAbraham, okwa kanghama pomufima umwe. Pomufima opo okwa fika po lwokomatango, efimbo olo ovakainhu vomoshilando osho have uya okuxwiila oimuna yavo momufima oo. Omupiya waAbraham okwa ilikana kuJehova a ti: ‘Omukainhu oo ta ka pa nge omeva ndi nwe nokuxwiila eengamelo dange oye na ninge omukulukadi waIsak.’

Diva Rebekka okwe uya okuteka omeva momufima oo. Eshi omupiya waAbraham a pula Rebekka omeva okunwa, Rebekka okwe mu pa a nwe. Kakele kaasho, Rebekka okwa xwiila yo eengamelo adishe domupiya oo. Kashi fi oshilonga shipu okuxwiila eengamelo, molwaashi ohadi nu omeva mahapu neenghono.

Eshi Rebekka a mana okuxwiila eengamelo, omupiya waAbraham okwe mu pula kutya xe olyelye. Okwa pula yo Rebekka ngeenge ota dulu oku ka nangala keumbo lavo. Rebekka okwa nyamukula a ti: ‘Tate oBetuel noto dulu oku ka nangala keumbo letu, molwaashi oku na onhele yokunangala.’ Omupiya waAbraham okwa li e shi shii kutya Betuel okwa li a dalwa kuNahor, omumwaina waAbraham. Okwa twa eengolo koshipala shaJehova ndele te mu pandula eshi e mu kwafela a mone ovapambele vaAbraham.

Oufiku oo, omupiya waAbraham okwa lombwela Betuel nosho yo omumwaina waRebekka, Laban, kutya oshike she mu endifa. Eshi e va hokololela kutya okwa tumwa kuAbraham a ka kongele Isak omukulukadi, aveshe ova dimina kutya ota dulu okuya naRebekka a ka hombolwe po kuIsak. Rebekka okwa ti ngahelipi eshi a pulwa? Okwa ti: ‘Oshi li nawa, onda hala okuya.’ Mefiku la landula ko, omupiya waAbraham naRebekka ova londa eengamelo ndele tava i pamwe kuKanaan.

Ova ka fika kuKanaan efimbo lokomatango. Eshi va fika, Rebekka okwa mona omulumenhu ta ende melundu. Omulumenhu oo okwa li Isak. Eshi Isak a mona Rebekka, okwa li a hafa neenghono. Pefimbo olo, Isak okwa li natango a nyika oluhodi molwaashi ina, Sara, okwa hangwa ashike opo a fi omido nhatu da pita. Ndele eshi Isak naRebekka va hombola, Isak okwa li e mu hole neenghono noina kala vali a nyika oluhodi.

Genesis 24:1-67.

Lihonga shihapu

Rebekka okwa li a hala okuhafifa Jehova

Ongahelipi hatu dulu okuhopaenena Rebekka? Lesha ehokololo nokulihonga shihapu kombinga yaye.