Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 26

Job okwa li omudiinini kuKalunga

Job okwa li omudiinini kuKalunga

MBELA ku uditile onghenda omulumenhu oo ta vele e li mefano olo li li pombada? Edina laye oJob. Omukainhu oo e li ofika puye omukulukadi waye. Mbela ou shi shii kutya ota lombwele omushamane waye shike? Ota lombwela Job ta ti: ‘Efa Kalunga u fye.’ Natu ka taleni kutya mbela omolwashike omukulukadi waJob ta popile ngaho nomolwashike Job a li ta mono oixuna neenghono.

Job okwa li omulumenhu omudiinini nokwa li ha dulika kuJehova Kalunga. Okwa li ha kala moshilongo shedina Us. Oshilongo osho osha li popepi naKanaan. Jehova okwa li e hole Job neenghono, ashike opa li umwe oo e tonde Job. Mbela ou shi shii kutya olyelye?

Okwa li Satana Ondiaboli. Dimbuluka kutya Satana omweengeli mwii oo e tonde Jehova. Okwa li a ningifa Adam naEva va nyone kuJehova. Okwa li yo ta diladila kutya ota dulu okuheka ovanhu aveshe va kale itava dulika kuJehova. Ndele mbela okwa li ngoo a pondola okuninga ngaho? Ahowe, ka li a pondola nandenande. Diladila ashike kombinga yovalumenhu novakainhu vahapu ovo va li ovadiinini kuJehova, ovo twe lihonga nale kombinga yavo momahokololo a tetekela. Mbela oto dimbuluka po vangapi komadina?

Konima eshi Jakob naJosef va fila muEgipti, Job oye aeke a li omudiinini kuJehova kombada yedu e dule ovanhu aveshe. Jehova okwa li a hala Satana a shiive kutya ita dulu okuningifa ovanhu aveshe va kale tava longo owii. Onghee hano, okwa lombwela Satana a ti: ‘Tala komupiya wange Job. Job oha longele nge noudiinini.’

Satana okwa twifa Kalunga omhata a ti: ‘Job ote ku longele ashike noudiinini, molwaashi owe mu nangeka noupuna nowe mu pa oinima ihapu iwa. Ndele ngeenge owe mu kufa oinima aishe oyo, ote ke ku liteeka.’

Jehova okwa lombwela Satana a ti: ‘Inda u ka kufe po oinima aishe oyo Job e na. Mu ningila owii ngaashi wa hala, u tale ngeenge ote ke liteeka nge. Ashike ino mu dipaa nandenande!’

Tete, Satana okwa vakifa po eengobe neengamelo daJob. Okwa dipaifa po yo eedi daye. Opo nee Satana okwa dipaa po ovana vaJob 10, ovamati noukadona, noshikungulu shomhepo. Oshitivali, okwa etela Job omukifi uyahama neenghono. Job okwa li ta mono oixuna neenghono. Nomolwaasho omukulukadi waye okwe mu lombwela a ti: ‘Efa Kalunga u fye.’ Ndele nande ongaho, Job ina efa po Kalunga. Job okwa li yo a talelwa po kookaume vatatu ovanaipupulu, nova li ve mu lombwela kutya okwa kala ta longo owii nomolwaasho ta mono oixuna. Ndele nande ongaho, Job okwa kala ashike omudiinini kuKalunga.

Jehova okwa li a hafa neenghono eshi Job a kanyatela oudiinini waye. Xuuninwa, okwa li a nangeka noupuna Job ngaashi u shi wete mefano olo li li pedu. Jehova okwa li a velula omukifi waJob. Job okwa ka dala vali ounona 10 ve na ondjelo iwa. Okwa ka kala vali e na eengobe needi nosho yo eengamelo di dule luvali oimuna oyo kwa li e na nale.

Mbela naave oto ka kala ngoo omudiinini alushe kuJehova ngaashi Job? Ngeenge owa kala omudiinini kuye, ote ke ku nangeka yo noupuna. Oto ka dula nokuli oku ka kala nomwenyo fiyo alushe kombada yedu. Pefimbo olo, edu otali ka kala la wapekwa ngaashi oshikunino shaEden sha li.

Job 1:1-22; 2:1-13; 42:10-17.