Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 20

Dina ta i moupyakadi

Dina ta i moupyakadi

MBELA ou shi shii kutya Dina ota ka talela po oolyelye ngaashi u shi wete mefano olo? Ota i a ka talele po oukadona Ovakanaan. Mbela xe yaDina, Jakob, ota ka kala e udite ngahelipi ngeenge okwa udu kutya Dina oha ka talela po oukadona Ovakanaan? Opo u mone enyamukulo kepulo olo, diladila kwaasho Abraham naIsak va li ve udite shi na sha novakainhu Ovakanaan.

Mbela Abraham okwa li a hala omona waye Isak a hombole Omukanaan? Hasho, nandenande. Mbela Isak naRebekka ova li va hala omona wavo Jakob a hombole okakadona Okakanaan? Ahowe, kava li va hala Jakob a hombole Omukanaan. Mbela ou shi shii kutya omolwashike?

Omolwaashi Ovakanaan ova li hava longele oikalunga. Onghee hano, kava li ookaume vawa nokava li tava wapalele okuhombolafana navo. Hano, osha yela kutya Jakob ka li ta ka kala a hafa okuuda kutya omonakadona waye Dina okwa panga oukaume noukadona Ovakanaan.

Eendafano laDina noukadona ovo ole ke mu twala moupyakadi. Mbela ou wete omulumenhu Omukanaan oo ta tale Dina mefano olo? Edina laye oSikem. Efiku limwe, fimbo Dina a li a ka talela po oukadona Ovakanaan, Sikem okwa kwata Dina keenghono ndele tava i naye momilele. Oshinima osho Sikem a ninga osha puka, molwaashi ovanhu ovo va hombola ovo ashike tava dulu okuya momilele. Kakele kaasho, oshinima osho Sikem a ninga osha ka etifa omaupyakadi mahapu.

Ovamwaxe vaDina ova li va handuka neenghono eshi va uda kutya Sikem okwa kwata Dina keenghono. Simeon naLevi ova li va fula onya neenghono, nomolwaasho ova kufa omaongamukonda ndele tave livakele moshilando mokati koufiku. Ova ya pamwe novamwaxe ndele tava ka dipaa Sikem novalumenhu aveshe vomoshilando osho. Jakob okwa li a handuka eshi ovanamati vaye va longa owii wa tya ngaho.

Ndele mbela olyelye a li a etifa lela omaupyakadi aeshe oo? Dina oye a li a etifa omaupyakadi aeshe oo, molwaashi okwa li a panga oukaume novanhu ovo va li ihava dulika keemhango daKalunga. Mbela otwa hala okupanga oukaume novanhu ovo ihava dulika kuKalunga?

Genesis 34:1-31.