Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 19

Oukwaneumbo waJakob tau hapupala

Oukwaneumbo waJakob tau hapupala

TALA koukwaneumbo munene oo u li mefano olo. Mefano olo otamu monika Jakob novanamati vaye 12. Ndele Jakob okwa li yo e na ovanakadona. Mbela ou shii omadina ounona vaJakob? Natu ke lihongeni kombinga yavamwe vomuvo.

Lea okwa dalela Jakob ovanamati vane: Ruben, Simeon, Levi naJuda. Ndele Rakel okwa li a nyemata neenghono, molwaashi ka li ha mono ounona. Onghee hano, okwa yandja omupiya waye Bilha kuJakob opo a dale naye. Bilha okwa dalela Jakob ovanamati vavali: Dan naNaftali. Opo nee Lea naye okwa yandja omupiya waye Silpa kuJakob opo a dale naye. Silpa okwa dalela Jakob ovanamati vavali: Gad naAsser. Natango, Lea okwa ka dalela Jakob ovamati vavali: Isaskar naSebulon.

Xuuninwa, Rakel okwa ka dalela Jakob okamati ndele te ka luku Josef. Lwanima, ohatu ke lihonga shihapu kombinga yaJosef, molwaashi okwa ka ninga omulumenhu a fimana neenghono. Ovamati aveshe ovo 11 ova dalwa fimbo Jakob a li natango meumbo laLaban, xe yaRakel.

Jakob okwa li yo e na ovanakadona, ndele Ombibeli oya tumbula po ashike umwe kedina. Edina laye oDina.

Jakob okwa li a tokola okufiya po Laban nokushuna kuKanaan. Onghee hano, okwa ongela oukwaneumbo waye aushe noufita waye munene weedi noweengobe ndele tava i molweendo olo lile.

Konima eshi Jakob va fika muKanaan, Rakel okwa ka dala vali okamati kamwe. Okamati oko oka dalwa fimbo va li natango mondjila. Rakel okwa li a dala okaana oko noudjuu nohauxuuninwa okwa ka fya fimbo a li ta dala. Ashike okahanana ko oka li ke li nawa. Jakob okwe ka luka Benjamin.

Oshiwa okukoneka omadina aeshe ovanamati vaJakob 12, molwaashi omapata aeshe oshiwana shaIsrael okwa dja muvo. Omapata 10 aIsrael okwa li a lukilwa ovana vaJakob 10, ofimbo omapata avali aIsrael a lukilwa ovanamati vavali vaJosef. Pefimbo opo ovamati aveshe ovo va dalwa, Isak okwa li natango e na omwenyo, nosha yela kutya okwa li a hafa neenghono eshi a li e na ovatekulu vahapu. Ndele natu ka taleni kutya oshike sha ka ningilwa omutekulu waye Dina.

Genesis 29:32-35; 30:1-26; 35:16-19; 37:35.