Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 11

Outa wodula wotete

Outa wodula wotete

MBELA ou shi shii kutya oshike osho Noa a li a ninga tete eshi va dja mongulu yomomeva? Okwa li a ningila Kalunga exwikiloyambo. Osho oto dulu oku shi mona mefano olo li li pedu. Noa okwa li a ningila Kalunga exwikiloyambo loinamwenyo li li oshali yoku mu pandula eshi e va xupifa meyelu linene.

Mbela oto diladila kutya Jehova okwa li a hokwa oshali ya tya ngaho? Heeno, okwa li e i hokwa. Nomolwaasho, okwa li a udanekela Noa kutya ita ka hanauna po vali nandenande ounyuni neyelu.

Edu osho la ka kukuta filufilu. Opo nee Noa noukwaneumbo waye ova ka hovela onghalamwenyo ipe, eshi va dja mo mongulu yomomeva. Kalunga okwa li e va nangeka noupuna ndele te va lombwele ta ti: ‘Daleni ounona vahapu. Hapupaleni nokuyadifa edu alishe.’

Oshi na oupu ovanhu va li tava ka kala va tila kutya eyelu otali ke uya vali. Onghee hano, Kalunga okwa li a pa ovanhu edidiliko olo la li tali ke va dimbulukifa kutya ita ka hanauna po vali ounyuni neyelu. Mbela ou shi shii kutya edidiliko olo olilipi? Olo outa wodula.

Outa wodula ohau monika luhapu keulu konima eshi odula ya sheka, ngeenge oku na etango. Outa wodula ohau kala u na omaluvala mahapu mawa. Mbela owa mona nale outa wodula? Mbela ou wete outa wodula oo u li mefano olo li li pombada?

Kalunga okwa li a udanekela ovanhu a ti: ‘Itandi ka hanauna po vali ovanhu noinamwenyo neyelu. Ohandi ka tula outa wodula moilemo. Ngeenge outa wodula wa holoka moilemo, ohandi ka dimbuluka eudaneko lange.’

Ngeenge owa mono outa wodula, ou na oku ku dimbulukifa shike? Ou na okudimbuluka eudaneko olo Kalunga a udanekela ovanhu kutya ita ka hanauna po vali ounyuni neyelu linene.

Genesis 8:18-22; 9:9-17.