Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 8

Ovatongolume ovo va li kombada yedu

Ovatongolume ovo va li kombada yedu

MBELA oto ka diladila ngahelipi ngeenge owa mono omunhu te uya kwoove mulemule ta dulu okutwa moshihokohoko shonduda? Omunhu a tya ngaho oku na okukala omutongolume. Nalenale kombada yedu okwa li shili ovatongolume. Ombibeli otai ti kutya ooxe vovatongolume ovo ova li ovaengeli va dile meulu. Mbela osha li sha enda ngahelipi opo ovaengeli va dale ovanhu va tya ngaho?

Oto dimbuluka kutya omwengeli omunawii Satana okwa kala ta etifa omaupyakadi mahapu? Okwa li nokuli ta kendabala okuningifa ovaengeli vaKalunga va longe owii. Ovaengeli vamwe ova pwilikina kuSatana ndele tava fiye po oilonga oyo Kalunga a li e va pa va longe meulu. Opo nee ove uya kombada yedu ndele tava lundulukile momalutu opanhu. Mbela ou shi shii kutya omolwashike va ningila ngaho?

Ombibeli otai ti kutya ovanamati vaKalunga ovo ove shi ninga molwaashi ova li va mona ovakainhu vawa kombada yedu nova li va hala okukala pamwe navo. Onghee hano, ove uya kombada yedu ndele tava hombola ovakainhu ovo. Ombibeli otai ti kutya oshinima osho osha puka, molwaashi Kalunga okwa li a shita ovaengeli va kale ashike meulu.

Eshi ovaengeli novakainhu ovo va dala ounona, ounona vavo ova li va yooloka ko kounona vakwao. Potete, otashi dulika va li tava monika va fa ounona vakwao. Ndele eshi va li tava kulu, ova li ve na omalutu makula nova li ve na eenghono dihapu. Ova enda tava kulu fiyo va ninga ovatongolume.

Ovatongolume ovo ova li hava longo owii. Ova li hava hepeke nai ovanhu, molwaashi ova li ve na omalutu manene nova li ve na eenghono. Ova li tava kendabala okuningifa ovanhu aveshe va longe oilonga ii ngaashi vo.

Pefimbo opo, Henok okwa hangwa nale a fya. Ndele kombada yedu okwa li natango omulumenhu umwe oo kwa li ha longo ouwa. Edina laye oNoa. Noa okwa li ha longo alushe osho Kalunga a hala a longe.

Efiku limwe Kalunga okwa li a lombwela Noa kutya efimbo laYe lokuhanauna po ovanhu aveshe ovo hava longo owii ola fika. Ndele Kalunga okwa li a hala okuxupifa Noa, oukwaneumbo waye nosho yo oinamwenyo ihapu. Natu ka taleni kutya Kalunga okwa ka xupifa ngahelipi Noa noukwaneumbo waye nosho yo oinamwenyo.

Genesis 6:1-8; Judas 6.