Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 4

Adam naEva ova li va tewa mo meumbo lavo

Adam naEva ova li va tewa mo meumbo lavo

TALA kwaasho tashi ningwa po mefano olo. Adam naEva ova tewa mo moshikunino shiwashiwa shaEden. Mbela ou shi shii kutya omolwashike?

Omolwaashi ova ninga oshinima shii neenghono. Nomolwaasho Jehova okwe va handukila. Ou shii kutya oshinima shii osho Adam naEva va ninga oshilipi?

Ova ninga oshinima shonhumba osho Kalunga a li e va lombwela kutya inave shi ninga. Kalunga okwa li e va lombwela va lye oiimati yomiti domoshikunino. Ndele okwa tile kutya inava lya oiimati yomuti umwe, opo vaha fye. Omuti oo owa li waKalunga mwene. Otu shi shii nawa kutya osha puka okukufa po oshinima osho shihe fi shetu. Inashi puka mbela? Mbela oshike osho Adam naEva va ninga?

Efiku limwe fimbo Eva a li moshikunino oye aeke, puye opwe uya eyoka ndele tali popi naye. Diladila kwaasho! Eyoka olo ola lombwela Eva a lye oiimati yokomuti oo Kalunga a li e va lombwela kutya inava lya kuo. Jehova Kalunga ka li a shita omayoka haa popi. Onghee hano, osha yela kutya opa li umwe oo a li ta popi okupitila meyoka olo. Olyelye mbela?

Ka li nande Adam. Oku na ashike okukala umwe womovaengeli ovo Jehova a shita ofimbo ina shita edu. Ovaengeli itatu dulu oku va mona nomesho etu okomutwe. Opa li omweengeli umwe oo a li a kwatwa kounwa. Omweengeli oo okwa li ta diladila a ninge omupangeli ngaashi Kalunga. Okwa li nokuli a hala ovanhu va kale tava dulika kuye ponhele yokukala tava dulika kuJehova Kalunga. Omweengeli oo oye a popya okupitila meyoka.

Omweengeli oo okwa li a heka Eva. Okwa lombwela Eva kutya ota ka fa Kalunga ngeenge okwa li oiimati yokomuti oo va kelelwa kuKalunga. Eva okwa li a itavela eendjovo domweengeli oo. Opo nee okwa kufa oshiimati shomuti oo ndele ta li, nokwa pa yo Adam a lye. Kungaho, Adam naEva inava dulika kuKalunga. Nomolwaasho ova tewa mo moshikunino shiwa osho sha li eumbo lavo.

Ndele Kalunga okwa hala edu alishe monakwiiwa li ka kale ngaashi oshikunino shaEden. Ohatu ke lihonga komesho kutya ongahelipi nafye hatu dulu oku ka kufa ombinga moilonga yokuwapeka edu li kale ngaashi oshikunino shaEden. Paife natu ka taleni kutya Adam naEva ova ka kala nonghalamwenyo ya tya ngahelipi.

Genesis 2:16, 17; 3:1-13, 24; Ehololo 12:9.