Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 9

Noa ta tungu ongulu yomomeva

Noa ta tungu ongulu yomomeva

NOA okwa li e na omukulukadi novanamati vatatu. Ovanamati vaye ova li Sem, Ham naJafet. Ovanamati vaye navo ova li ve na ovakulukadi vavo. Onghee hano, oukwaneumbo waNoa aushe kumwe owa li u na ovanhu vahetatu.

Kalunga okwa li a lombwela Noa a ninge oshinima osho inashi monika nande onale. Okwe mu lombwela kutya na tunge ongulu inene yomomeva. Ongulu oyo oya li inene i fike poshikepa. Ndele oya li tai monika ya fa oshipakete shinene, sho oshile. Kalunga okwa lombwela Noa a ti: ‘Tungila mo omitala nhatu de lilonda noku i tukula meenduda dihapu.’ Eenduda dimwe oda li tadi ka kala Noa noukwaneumbo waye. Dimwe oda li tadi ka kala oinamwenyo, ofimbo dimwe oda li tadi ka kala dokutuvikila oikulya oyo va li tava ka lya ngeenge eyelu le uya.

Kalunga okwa li yo a lombwela Noa a file nawa ongulu yomomeva neka opo iha ka ye omeva meni. Okwa li yo e mu lombwela a ti: ‘Ohandi ka eta eyelu linene olo tali ka hanauna po ounyuni aushe. Keshe ou ina ya mongulu yomomeva ota ka fya.’

Noa novanamati vaye ova li va dulika kuJehova ndele tava hovele okutunga ongulu yomomeva. Ashike ovanhu vamwe ova li tave va yolo. Ovanhu ovo vai ova twikila ashike nokulonga owii. Kapa li nande oumwe a li a itavela kutya Kalunga ota ka eta shili eyelu ngaashi Noa e va lombwela.

Osha li sha kwata efimbo lile opo Noa a mane okutunga ongulu yomomeva, molwaashi ongulu oyo oya li inene. Hauxuuninwa oya ka pwa okutungwa konima eshi pa pita omido dihapu. Opo nee Kalunga okwa lombwela Noa a twale oinamwenyo mongulu yomomeva. Kalunga okwa li e mu lombwela a twale mo oinamwenyo yomaludi amwe kooivali, oshindume noshikadi. Okwa li yo e mu lombwela a twale mo oinamwenyo yomaludi amwe kooiheyali. Okwa li yo e mu lombwela a twale mo oudila vomaludi aeshe. Noa okwa li a ninga naanaa ngaashi Kalunga e mu lombwela.

Konima yaasho, Noa noukwaneumbo waye navo ova ka ya mongulu yomomeva, opo nee Kalunga okwa idila omuvelo. Noa noukwaneumbo waye ova kala mongulu yomomeva va teelela eyelu li uye. Diladila nee ngeno mu li pamwe navo mongulu yomomeva mwa teelela eyelu li uye. Mbela eyelu ole uyile ngoo shili ngaashi Kalunga a tile?

Genesis 6:9-22; 7:1-9.