Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 6

Omonamati muwa nomonamati mwii

Omonamati muwa nomonamati mwii

TALA kuKain naAbel pefano olo li li pedu. Aveshe vavali ova ninga ovakulunhu. Kain okwa li omunamapya. Okwa li ha kunu oilya, oiimati noikwambidi.

Abel okwa li omufita weedi. Okwa li e hole okufila oshisho oudjona. Oudjona ohava kulu ndele tava ningi eedi da kula. Konima yefimbo, Abel okwa ka kala e na oufita weedi munene.

Efiku limwe Kain naAbel ova li va etela Kalunga eeshali. Kain okwa etela Kalunga imwe yoikunomwa yaye. Abel okwa li a etela Kalunga odi oyo ya li iwa unene i dule dikwao. Kalunga okwa li a hokwa Abel nosho yo oshali oyo e mu etela. Ndele Kalunga ka li a hokwa Kain noshali yaye. Mbela ou shi shii kutya omolwashike?

Hamolwaashi ngeno Abel a li a etela Kalunga oshali iwa unene i dule yaKain. Ndele omolwaashi Abel okwa li omulumenhu muwa. Abel okwa li e hole Jehova nosho yo omukulu waye Kain. Ndele Kain okwa li omulumenhu mwii; ka li e hole ondenge yaye Abel.

Kalunga okwa li a lombwela Kain kutya na lundulule oikala yaye. Ndele Kain ka li a pwilikina kuKalunga. Okwa li a handuka neenghono, molwaashi Kalunga okwa li e hole unene Abel. Onghee hano, efiku limwe Kain okwa lombwela Abel a ti: ‘Ila tu ye moixwa.’ Fimbo ve li moixwa ovo aveke, Kain okwa denga ondenge yaye nodibo. Kain okwa denga Abel a diinina, ndele ta fi. Kain ka li mbela a ninga oshinima shinyanyalifi?

Nonande Abel okwa fya, Kalunga ine mu dimbwa. Abel okwa li omulumenhu muwa. Jehova Kalunga iha dimbwa nande ovanhu va tya ngaho. Onghee hano, Jehova ota ka nyumuna Abel monakwiiwa. Ngeenge Abel a nyumunwa, ita ka fya vali nandenande. Ota ka kala nomwenyo fiyo alushe kombada yedu. Mbela itashi ka kala shihafifa okushiivafana novanhu ovo va li ve na oikala iwa ngaashi Abel?

Ndele Kalunga iha hokwa ovanhu ovo ve na oikala ya fa yaKain. Konima eshi Kain a dipaa ondenge yaye, Kalunga okwe mu handukila nokwe mu taataa a ka kale kokule novapambele vaye. Eshi Kain a ya koilongo yokokule, okwa li a ya pamwe naumwe womovamwainakadona oo a ka ninga omukulukadi waye.

Konima yefimbo, Kain nomukulukadi waye ova ka dala ounona. Ovanamati novanakadona vakwao vaAdam naEva ova enda tava hombolafana nova ka dala yo ounona. Diva kombada yedu okwa ka kala ku na ovanhu vahapu. Natu ke lihongeni kombinga yavamwe vomuvo.

Genesis 4:2-26; 1 Johannes 3:11, 12; Johannes 11:25.

Lihonga shihapu

Abel—‘Ota popi natango nande okwa fya’

Ongahelipi hatu dulu okulihonga kombinga yaAbel neitavelo laye ngeenge Ombibeli oya popya ashike kanini kombinga yaye?