Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 1

Nghee Kalunga a hovela okushita oinima

Nghee Kalunga a hovela okushita oinima

OINIMA aishe iwa oyo tu na oya dja kuKalunga. Kalunga okwa shita etango li kale tali minikile omutenya nokwa shita omwedi neenyofi di kale tadi minikile oufiku opo tu dule okumona ko. Okwa shita yo edu opo tu kale ko.

Ndele etango, omwedi, eenyofi nedu hayo ya shitwa tete. Mbela ou shii kutya oshike osho Kalunga a shita tetetete? Kalunga okwa shita tete ovanhu ve mu fa. Ovanhu ovo itatu dulu oku va mona nomesho etu, ngaashi ashike itatu dulu okumona Kalunga. Ombibeli oya ti kutya ovanhu ovo ovaengeli. Kalunga okwa shita ovaengeli va kale pamwe naye meulu.

Omwengeli oo Kalunga a shita tete okwa li a yooloka ko kovaengeli vakwao. Okwa li Omona waKalunga wotete, nokwa li ha longo pamwe naKalunga. Okwa li a kwafela Kalunga mokushita oinima aishe ikwao, mwa kwatelwa etango, omwedi, eenyofi nosho yo edu.

Edu okwa li tali monika ngahelipi pefimbo olo? Pehovelo kapa li omunhu ta dulu okukala kombada yedu. Edu alishe ola li la tuvikilwa komeva efuta. Ashike Kalunga okwa li a hala ovanhu va kale kombada yedu. Onghee hano, okwa hovela okulongekida edu opo ovanhu va dule okukala kulo. Mbela okwa li a ninga po shike?

Shotete, edu ola li la pumbwa ouyelele. Onghee hano, Kalunga okwa ningifa ouyelele wetango u minikile kedu. Osho osha ningifa opo pa kale oufiku nomutenya. Konima yefimbo, Kalunga okwa ningifa edu li dje ko koshi yomeva opo pa kale oukukutu.

Potete, kombada yedu kakwa li sha nandenande. Okwa li taku monika ngaashi sha ulikwa mefano olo. Kakwa li ku na eengala ile omiti ile oinamwenyo. Mefuta namo kamwa li mu na eeshi. Kalunga okwa kala ta longo noudiinini opo a longekide edu li kale la wapala opo ovanhu noinamwenyo va dule okukala ko.

Jeremia 10:12; Ovakolossi 1:15-17; Genesis 1:1-10.