Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Embo lange lomahokololo Ombibeli

 EHOKOLOLO 7

Omulumenhu omuladi

Omulumenhu omuladi

ESHI ovanhu va enda tava hapupala kombada yedu, vahapu ova li hava longo owii ngaashi Kain. Ndele opa li omulumenhu umwe oo kwa li ha longo ouwa. Edina laye oHenok. Henok okwa li omulumenhu omuladi. Nonande ovanhu vopefimbo laye ova li hava longo oukolokoshi, Henok okwa kala ta longele Kalunga noudiinini.

Mbela ou shi shii kutya omolwashike ovanhu vopefimbo opo va li hava longo owii muhapu? Mbela oto dimbuluka kutya olyelye a li a ningifa Adam naEva va nyone kuKalunga mokulya oiimati yomuti oo kwa li va kelelwa vaha lye kuo? Heeno, okwa li omweengeli omunawii. Ombibeli oya ti kutya edina laye oSatana. Satana onghee ngoo ta kendabala natango okuningifa ovanhu va longe owii.

Efiku limwe Jehova Kalunga okwa li a tuma Henok a ka lombwele sha ovanhu nonande kava li va hala oku shi uda. Henok okwa li a tumwa e va lombwele ta ti: ‘Mafiku Kalunga ota ka hanauna po aveshe ovo hava longo owii.’ Otashi dulika ovanhu ovo va li va handuka neenghono eshi va uda eendjovo odo. Otashi dulika nokuli va li tava kendabala okudipaa Henok. Nomolwaasho, Henok okwa li e na okukala e na ouladi opo a dule okulombwela ovanhu osho Kalunga a li ta ka ninga.

Kalunga ka li a efa Henok a kale nomwenyo efimbo lile mokati kovanhu vai va tya ngaho. Henok okwa kala ko ashike oule womido 365. Omolwashike taku tiwa kutya okwa kala ko “ashike oule womido 365”? Omolwaashi ovanhu vopefimbo laye ova li hava kala ve na eenghono dihapu nova li hava kala nomwenyo oule wefimbo lile. Pashihopaenenwa, omonamati waHenok, Metusala, okwa fya e na omido 969.

Konima eshi Henok a fya, ovanhu ova ka kala nokuli tava longo owii neenghono shi dulife nale. Ombibeli oya ti kutya ‘ova kala tava diladila okulonga owii efimbo alishe,’ ‘nedu ola li li yadi oukolokoshi.’

Mbela ou shii etomheno limwe kutya omolwashike kombada yedu kwa li ku yadi oukolokoshi pefimbo olo? Omolwaashi Satana okwa li a konga po ondunge ipe yokuningifa ovanhu va longe owii. Ohatu ke lihonga kombinga yaasho mehokololo tali landula ko.

Genesis 5:21-24, 27; 6:5; Ovaheberi 11:5; Judas 14, 15.