Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 8

Ouhamba waKalunga oshike?

Ouhamba waKalunga oshike?

1. Eilikano la shiivika apeshe lilipi hatu ka kundafana?

OVANHU vahapu ove shii nawa eilikano olo hali ifanwa Tate Yetu u li meulu ile Eilikano lOmwene wetu. Eilikano olo Jesus okwe li longifa eshi a li ta hongo ovahongwa vaye nghee ve na okwiilikana. Mbela okwa li a ilikana kombinga yashike, nomolwashike eilikano olo la fimana?

2. Jesus okwe tu honga tu ilikane kombinga yoinima itatu ya fimanenena ilipi?

2 Jesus okwa ti: “Hano, mu nokwiilikana ngaha: Tate yetu ou u li meulu! Edina loye nali yapulwe; ouhamba woye nau uye; ehalo loye nali wanifwe kombada yedu yo ngaashi meulu.” (Lesha Mateus 6:9-13.) Omolwashike Jesus e tu honga tu ilikane shi na sha noinima oyo itatu? — Tala omafatululo oitya pexulilo lembo, oshitwa 20.

3. Oshike twa pumbwa okushiiva shi na sha nOuhamba waKalunga?

3 Otwe lihonga nale kutya edina laKalunga oJehova. Otwa kundafana yo kombinga yehalo laKalunga li na sha novanhu nosho yo edu. Ndele mbela Jesus okwa li a hala okutya shike eshi a ti: “Ouhamba woye nau uye”? Ohatu ke lihonga kutya Ouhamba waKalunga oshike, otau ka ninga shike nonokutya ongahelipi tau ka yapulifa edina laKalunga.

OUHAMBA WAKALUNGA OSHIKE?

4. Ouhamba waKalunga oshike, na olyelye Ohamba yao?

4 Jehova okwa dika po epangelo laye lomeulu nokwa hoolola Jesus a ninge Ohamba yalo. Epangelo olo mOmbiibeli ola ifanwa Ouhamba waKalunga. Jesus okwa nangekwa po e li “Omwene woovene nOhamba yeehamba.”  (Ehololo 17:14) Jesus ota dulu okulonga ouwa e dulife ovapangeli aveshe, noku na eenghono di dulife dovapangeli aveshe vopanhu.

5. Epangelo laKalunga otali ka pangela okudja peni, notali ka pangela peni?

5 Jesus okwa shuna meulu konima yomafiku omilongo nhe eshi a nyumunwa. Opo nee Jehova okwe mu nangeka po e li Ohamba yOuhamba waYe. (Oilonga 2:33) Epangelo laKalunga olo li li meulu otali ka pangela kombada yedu alishe. (Ehololo 11:15) Ombiibeli oya popya shi na sha nOuhamba waKalunga ya ti kutya ‘Ouhamba womeulu.’ — 2 Timoteus 4:18.

6, 7. Omolwashike taku tiwa kutya Jesus oku dule eehamba adishe dopanhu?

6 Ombiibeli oya ti kutya Jesus oku dule eehamba adishe dopanhu molwaashi “ita fi vali.” (Ovaroma 6:9) Ovapangeli vopanhu aveshe ohava fi, ashike Jesus ota kala fiyo alushe. Omauwa aeshe oo Jesus te ke tu ningila otaa ka kala fiyo alushe.

7 Ombiibeli oya xunganeka kutya Jesus ota ka kala Ohamba i na onghenda nota ka pangela pauyuki. Oya ti: ‘Omhepo yaKalunga otai ka kala nokutulumukwa kombada yaye, omhepo yeendunge noyounongo, omhepo yomayele noyeenghono, omhepo yeshiivo noyokutila Omwene. Ndele oye oku nohokwe yokutila Omwene; ndele ita tokola ngaashi omesho taa tale noita yukifa ngaashi omatwi aye taa udu; ndelenee eehepele ote di tokola pauyuki.’ (Jesaja 11:2-4) Mbela ino hala oku ka kala koshi yepangelo li na Ohamba ya tya ngaho?

8. Otu shi shii ngahelipi kutya Jesus ita ka pangela oye aeke?

8 Kalunga okwa hoolola ovanhu kombada yedu va ka pangele pamwe naJesus meulu. Pashihopaenenwa, omuyapostoli Paulus okwa li a lombwela Timoteus a ti:  ‘Ngeenge hatu lididimikeni, ohatu ka kaleni nokupangela yo pamwe naye.’ (2 Timoteus 2:12) Ovanhu vangapi tava ka pangela pamwe naJesus?

9. Ovanhu vangapi tava ka pangela pamwe naJesus meulu? Onaini Kalunga a hovela oku va hoolola?

9 Ngaashi twe lihonga mEtukulwa eti-7, omuyapostoli Johannes okwa li a pewa emoniko omo a mona Ohamba Jesus i li meulu pamwe neehamba dikwao 144 000. Oolyelye ve li mongudu yovanhu 144 000? Johannes okwa popya kutya ovava ‘va shangelwa edina lodjona [Jesus] nedina laXe moipala yavo.’ Okwa weda ko vali a ti: “Ovo ava hava shikula Odjona keshe apa tai i. Ovo va kulilwa movanhu.” (Lesha Ehololo 14:1, 4.) Kalunga okwa hoolola Ovakriste ovadiinini 144 000 va ka kale “nokupangela kombada yedu” pamwe naJesus. Ngeenge va fi, ohava nyumuninwa omwenyo womeulu. (Ehololo 5:10) Jehova okwa hovela okuhoolola Ovakriste ovadiinini okudja mefelemudo lotete, va ninge vamwe vomo 144 000 ovo tava ka pangela ve li eehamba.

10. Omolwashike taku tiwa kutya Jehova okwe tu ulikila ohole eshi a hoolola Jesus nosho yo ovanhu 144 000 va ka pangele?

10 Jehova oku na ko nasha nafye shili, nomolwaasho a hoolola ovanhu ovo va ka pangele pamwe naJesus. Jesus ota ka kala omupangeli muwa molwaashi oku udite ko onghalo yetu; oku shii nawa onghalo yokumona oixuna omo ovanhu hava piti. Omuyapostoli Paulus okwa ti kutya Jesus oku “uditile oungone wetu olukeno” nokwa “shindwa moinima aishe ngaashi fye.” (Ovaheberi 4:15; 5:8) Ovakriste 144 000 navo onghalo younhu ove i shii. Navo ova pita monghalo yokuhawanenena noyouyahame. Otu na oushili kutya Jesus nosho yo ovapangeli pamwe naye 144 000 otava ka uda ko filufilu omaliudo etu nosho yo omaupyakadi oo hatu ungaunga nao.

 OSHO OUHAMBA WAKALUNGA TAU KA NINGA

11. Omolwashike Jesus a honga ovahongwa vaye va ilikane opo ehalo laKalunga li wanifwe meulu?

11 Jesus okwa honga ovahongwa vaye va ilikane opo ehalo laKalunga li wanifwe meulu. Omolwashike mbela? Otwe lihonga mEtukulwa 3 kutya Satana ina dulika kuJehova. Ndele konima yaasho, Jehova okwe mu efa a kale meulu oule wokafimbo pamwe neendemoni ile ovaengeli ovo vehe fi vali ovadiinini. Onghee, pefimbo opo ovaengeli vamwe meulu kava li tava longo ehalo laKalunga. Ohatu ke lihonga shihapu kombinga yaSatana neendemoni daye mEtukulwa 10.

12. Oiningwanima ivali ya fimana ilipi ya popiwa mEhololo 12:10?

12 Ombiibeli oya popya kutya diva eshi Jesus a nangekwa po e li Ohamba yOuhamba waKalunga, okwa li a lwifa Satana. (Lesha Ehololo 12:7-10.) Ovelishe 10 oya hokolola oiningwanima ivali ya fimanenena. Shotete, Ouhamba waKalunga owa hovela okupangela meulu, nOhamba yao oJesus Kristus. Oshitivali, Satana okwa umbwa mo meulu a umbilwa kombada yedu. Ngaashi hatu ke shi kundafana, oiningwanima oyo oya ningwa nale.

13. Onghalo meulu oya ka kala ya tya ngahelipi eshi Satana a umbwa mo?

13 Ombiibeli oya popya shi na sha nanghee ovaengeli ovadiinini va li va hafa eshi Satana neendemoni daye va umbwa mo meulu. Ombiibeli oya ti: “Nyakukweni, onye omaulu, naava mwa kala muo!” (Ehololo 12:12) Paife meulu omu na ombili nelongelokumwe molwaashi aveshe ava ve li mo otava longo ehalo laKalunga.

Okudja eshi Satana neendemoni daye va umbwa mo meulu, kombada yedu okwa kala okumona oixuna kuhapu. Okumona oixuna oko mafiku otaku xulu po

14. Satana okwa etifa onghalo ilipi kombada yedu eshi a umbwa mo meulu?

14 Onghalamwenyo yokombada yedu oya yooloka ko filufilu kwaayo yomeulu. Ovanhu ohava shakeneke omaupyakadi ‘osheshi ondiaboli oya kulukila pedu’ noi “nehandu linene, osheshi i shi shii i nokafimbo kaxupi  kongaho.” (Ehololo 12:12) Satana okwa handuka neenghono. Okwa umbwa mo meulu noku shii kutya mafiku ota ka hanaunwa po. Ota kendabala ngaashi ta dulu opo a etele ovanhu omaupyakadi, omauyahame nosho yo okumona oixuna.

15. Elalakano laKalunga olashike li na sha nedu?

15 Elalakano laKalunga li na sha nedu inali lunduluka. Natango okwa hala ovanhu va wanenena va kale moparadisa kombada yedu. (Epsalme 37:29) Ndele ongahelipi Ouhamba waKalunga tau ka wanifa po elalakano olo?

16, 17. Daniel 2:44 ote tu lombwele shike shi na sha nOuhamba waKalunga?

16 MuDaniel 2:44 omu na exunganeko olo tali ti: “Ndelenee pomafiku eehamba dinya Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” Mbela exunganeko olo otali tu hongo shike shi na sha nOuhamba waKalunga?

17 Shotete, exunganeko olo otali tu lombwele kutya Ouhamba waKalunga otau ka hovela okupangela “pomafiku eehamba dinya.” Osho osha hala okutya omapangelo okombada yedu opo taa hangika eshi Ouhamba oo tau ka hovela okupangela. Oshitivali, Ouhamba waKalunga otau ka kala fiyo alushe noitau ka pingenwa po kepangelo limwe. Oshititatu, otapa ka kala oita pokati kOuhamba waKalunga nomapangelo oo e li mounyuni kunena. Ouhamba waKalunga otau ka findana, ndele tau ka kala nokupangela oo auke kombada yedu alishe, novanhu otava ka kala koshi yepangelo liwa kuhe na vali.

18. Oita oyo tai ka kala pokati kOuhamba waKalunga nomapangelo omounyuni ohai ifanwa shike?

18 Ongahelipi Ouhamba waKalunga tau ka pingena po  omapangelo oo e li kombada yedu kunena? Fimbo oita yaxuuninwa oyo hai ifanwa Harmagedon inai uya, eendemoni otadi ka pukifa ‘eehamba dounyuni aushe noku di shivila oita mefiku linene laKalunga omunamapangelo aeshe.’ Omapangelo opanhu otaa ka kondjifa Ouhamba waKalunga. — Ehololo 16:14, 16; tala omafatululo oitya pexulilo lembo, oshitwa 10.

19, 20. Omolwashike twa pumbwa Ouhamba waKalunga u uye u pangele kombada yedu?

19 Omolwashike twa pumbwa Ouhamba waKalunga? Otwe u pumbwa omolwomatomheno atatu. Lotete, ovanhu aveshe ovalunde nomolwaasho hava vele nohava fi. Ashike Ombiibeli oya popya kutya ohatu ka kala nomwenyo fiyo alushe koshi yOuhamba waKalunga. Johannes 3:16 ota ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.”

20 Etomheno etivali ololo kutya, otwa pumbwa Ouhamba waKalunga molwaashi otwa dingililwa kovakolokoshi. Ovanhu vahapu ohava popi oipupulu, ovakengeleledi nove na elihumbato lii. Otu shii kutya ovanhu va tya ngaho itatu dulu oku va xulifa po, ashike Kalunga ota dulu oku shi ninga. Ovo tava twikile okulonga owii otava ka hanaunwa po puHarmagedon. (Lesha Epsalme 37:10.) Etomheno etitatu ololo kutya, omapangelo opanhu oku na oulingilingi, omakwanyanya nokae na eenghono. Ihaa kwafele ovanhu va kale hava dulika kuKalunga. Ombiibeli oya ti kutya “omunhu ta pangelele omukwao omupya.” — Omuudifi 8:9.

21. Ouhamba waKalunga otau ka wanifa po ngahelipi ehalo laYe kombada yedu?

21 Konima yaHarmagedon, Ouhamba waKalunga otau ka wanifa po filufilu ehalo laye kombada yedu alishe. Pashihopaenenwa, Ouhamba waKalunga otau ka hanauna  po Satana neendemoni daye. (Ehololo 20:1-3) Nokungaho, itapa ka kala vali ouyahame nefyo. Ovanhu aveshe ovadiinini otava ka dula okukala nomwenyo fiyo alushe mOparadisa kombada yedu omolwekulilo. (Ehololo 22:1-3) Ouhamba oo otau ka yapulifa edina laKalunga. Mbela osho osha hala okutya ngahelipi? Osha hala okutya eshi epangelo laKalunga tali ka pangela edu, ovanhu aveshe otava ka fimaneka Jehova. — Tala omafatululo oitya pexulilo lembo, oshitwa 21.

ONAINI JESUS A NINGA OHAMBA?

22. Otu shi shii ngahelipi kutya Jesus ka li a ningwa Ohamba eshi a li kombada yedu ile diva eshi a nyumunwa?

22 Jesus okwa honga ovahongwa vaye va kale hava ilikana ngaha: “Ouhamba woye nau uye.” Osho osha li tashi ulike kutya epangelo laKalunga otali ke uya monakwiiwa. Tete Jehova ota ka dika po epangelo ndele ta nangeke po Jesus a ninge Ohamba yalo. Jesus ka li a ningwa Ohamba diva eshi a shuna meulu, ndele ponhele yaasho, okwa li e na okuteelela pa pite efimbo. Konima eshi Jesus a nyumunwa, Petrus naPaulus ova popya shi na sha nexunganeko olo la wanifilwa Jesus, tali hangwa mEpsalme 110:1. Jehova  okwa popya mexunganeko olo a ti: “Kala omutumba kolulyo lange, fiyo handi ningi ovatondi voye oshilyatelo shokeemhadi doye.” (Oilonga 2:32-35; Ovaheberi 10:12, 13) Mbela Jesus okwa li e na okuteelela efimbo li fike peni opo Jehova e mu ninge Ohamba?

Ouhamba waKalunga otau ka wanifa po filufilu ehalo laKalunga kombada yedu

23. (a) Onaini Jesus a hovela okupangela e li Ohamba yOuhamba waKalunga? (b) Oshike hatu ke lihonga metukulwa tali landula?

23 Oule womido dihapu komesho yo 1914, Ovakriste ovadiinini ova li va mona kutya omudo oo otau ka kala udidilikwedi shi na sha nokuwanifwa kwomaxunganeko Ombiibeli. Okudja mo 1914, oiningwanima younyuni oya ulika kutya osho va li va itavela oshoshili. Momudo oo, Jesus omo a hovela okupangela e li Ohamba. (Epsalme 110:2) Diva konima yaasho, Satana okwa li a umbilwa kombada yedu, nopaife oku na ko ashike ‘okafimbo kaxupi kongaho.’ (Ehololo 12:12) Metukulwa tali landula, ohatu ka mona omaumbangi oo taa ulike kutya otu li momafiku axuuninwa. Ohatu ke lihonga yo kutya mafiku Ouhamba waKalunga otau ka wanifa po filufilu ehalo laKalunga kombada yedu. — Tala omafatululo oitya pexulilo lembo, oshitwa 22.